Green nga hukmanan

Moabot sa 20 ka punoan nga kahoy ang putlon aron mahimo ang 500 ka reams nga papel. Moabot usab usa ka gatos ka libo (100,000) ka litro nga tubig ang gigamit sa paghimo sa papel, tubig nga dili na magamit tungod kay kontaminado na kini sa kemikal nga modagayday sa kalikopan nga makahilo sa kasapaan ug kadagatan.

Tungod niini gipagawas sa Korte Suprema ang Administrative Memorandum No. 11-9-4-SC nga gitawag og Efficient Use of Paper Rule kaniadtong Nobyembre 13, 2012 pito ka tuig na ang nakalabay aron minosan sa hudikatora ang pagpatuyang sa sunod-sunod nga paggamit sa papel aron maluwas ug maprotektahan ang kalasangan, malikayan ang mga pagdahili sa yuta ug maminusan ang grabing epekto sa pagkausab sa klima nga nasinati karon sa kalibotan.

Pinaagi niining maong Administrative Memorandum ang Korte Suprema nagtoo nga mahimo niya ang dako niyang parte sa pagluwas sa kakahoyan, pagpreserbar sa bililhon kaayong tubig ug ang pagpanalipod sa inahang kalikopan.

Ubos sa Administrative Memorandum nga gitawag og Efficient Use of Paper Rule, ang mga pleadings, motions ug mga poparihang papel nga iduso sa tanang hukmanan ug mga administrative bodies nga adunay gahum sa pagresolbar og mga kaso kinahanglan nga suwaton na kini nga single space nga adunay usa og tunga nga gintang sa matag paragraph gamit ang mabasa nga font nga adunay gidak-on nga 14 ug 13 inch by 8.5 inch o legal size nga puti nga bond paper.

Ang tanang papel nga iduso sa hukmanan kinahanglan nga adunay margins nga 1.5 inch sa wala, 1.2 sa taas ug 1.0 inch sa tuo ug ubos.

Giminusan usab sa korte suprema ang gidaghanon sa kopya nga ilang pangayoon sa matag kaso nga moabot sa ilang buhatan.

Kining Administrative Memorandum nga gipagawas sa Korte Suprema dugang lamang kini sa mga nag-una na nga diin ilang gipakita ang pagpanalipod sa kalikopan sama sa Writ of Kalikasan ug uban pa.