Wrestling with God

Bisag nagpabilin ang taligsik human sa kusog nga ulan sa miaging Martes, Hulyo 9, napuno gihapon ang 6:00a.m. mass sa mga nanimbahay sa Our Lady of Mount Carmel Church.

Lahi sa ubang simbahan, wala gyuy nagtabi bisag wala pay misa. Tanang nanglingkod nga naa sa sulod, nakatutok ang mga mata ngadto atubangan sa altar. Usag-usa nagpaabot sa mga pulong sa Diyos.

Sa laktod, hilom kaayo ang palibot. Ultimong dagom nga mahulog sa salog, madungog gyud ang kalanog. Ingon niini kadako ang pagbalaan sa mga nanimbahay sa balay sa Ginoo, diin ubay-ubay na ang nakasinati nga kutob sa butang nga ilang gipangayo Kaniya, gihatag gayod. Hinuon, dili dihadiha. Usahay, malangay.

Sagad sa maka-experience niini, kadtong adunay hugot nga pagtuo ug pagsalig sa Kahitas-an, diin taliwala sa mga naghagiyos nga bagyo sa pagsulay, inay mobulag ang iyang pagkasanga sa gitaptan nga bagon, misamot hinuon kapilit ang iyang paggakos Kaniya. Busa, paglurang sa bagyo, naangkon ang bulawanong kahayag sa langit.

Saludo ko ni Rev. Father Vicente Florido Jr., kinsa maoy mi-officiate sa misa. Tiyempo sa homiliya, iyang gipaambit kadtong kaagi sa estudyanteng babaye, kinsa gustong motiwas pag-eskuyla pero walay ikagasto ang ginikanan.

Busa, napugos pag-undang. Naningkamot pagpangitag kapanginabuhian aron maoy patiwasog una sa pag-eskuyla ang iyang manghod hangtod nga makakuhag propesyon.

Tuod man, tapos sa iyang upat ka tuig nga pag-antos, napropesyonal iyang brother, diin nagtuo siya nga mao na pod kini ang motabang niya ug sa uban nilang igsuon.

Apan wala kini mahitabo. Hinungdan, nga misulay siya pagkuhag working scholar exam, diin katulo siya mahagbong. Dinhi, nakigbugno na sab siya sa dakong krus nga gisangon sa Ginoo niya. Ug bisan sa kabug-at, iyang gipas-an. Nakasulod siyag part time job sa usa ka food chain hangtod nakagraduwar gyod sa kursong maestra sa miaging Abril. Iyang pangandoy, nga unta makapasar sa kuhaonon niyang board exam.

Natandog ang tanang kasingkasing sa kamaayong mowali ni Fr. Vic, diin iyang gibunyagan ang kaagi sa estudyanteng kabos og ‘Wrestling with God’. Gihangyo niya ang tanang magtutuo nga duyogan siya sa pag-ampo nga makapasar sa eksam kining binuhat nga pirmeng nakig-wrestling sa mga life’s trials nga gihatag sa Ginoo kaniya.

Lord, dungga kami.