Daghang malipay kang Labella

Kanindot gyud kun tinud-on ni Mayor Edgardo Labella nga himoon na nga 24/7, nga sa ato tanang oras ug tanang adlaw sa semana, abli na ang opisina sa CHAMP sa Dakbayan sa Sugbo.

Ang CHAMP mao ang City Hospitalization Assistance and Medical Program sa siyudad sa Sugbo. Gusto ni Labella nga bukas gyud kanunay ang opisina sa CHAMP kay aron makaalagad kini kanunay sa mga taga siyudad.

Husto gyud kaayo kay mag-unsa man tuod kadtong mga pasyente sa ospital nga gustong magpatabang sa CHAMP kay mahimo na sila nga mo-check out og Sabado, o Domingo, kun wala sila’y opisina?

Pareho karon, na-admit ko sa ospital, unya kun moingon ang doktor nga mahimo na ko nga makagawas karong adlawa, o kaha ugma, unsaon man pag-process sa mga kawani sa CHAMP office kun Lunes hangtud Biyernes ra ang ilang serbisyo?

Nakasiguro ko nga ang tanang lumolupyo dinhi sa dakbayan sa Sugbo, bisan kadtong mga wala mobotar ni Mayor Labella sa miaging eleksyon, nangalipay nga ang opisina sa CHAMP moserbisyo na unya sulod sa 24 oras ug pito ka adlaw sa semana.

* * *                       

Nagkapundok ang mga mayor sa mga siyudad sa Sugbo uban sa laing mga mayor sa tanang siyudad sa nasud kay mitambong sila og seminar aron bansay sila nga modumala sa ilang mga katungdanan.

Garbo ko nga bisan dili ko mayor, apan nakatambong ko og    susama nga seminar kaniadto kauban ang mga mayor dinhi sa Cebu ug Bohol, ug gani naalaan pa ko nga mayor sab.

Ang higala nako nga direktor sa DILG maoy nagtugot nga makasalmot ko sa maong seminar aron masayod ko unsay angay’ng himoon sa mga mayor. Kun unsay reading materials nga gihatag sa mga official participants, gihatagan sab ko.

Sa question and answer portion, mangutana man sab ko. Magkatawa lagi ang amigo nako nga opisyal sa DILG kay ang lecturer mo-address man nako og “mayor.”

Bitaw, didto sa maong seminar, misamot nga nagkasuod sila si Mayor Edgardo Labella, Mandaue City Mayor Jonas Cortes, Talisay City Mayor Samsam Gullas ug uban pa nga mga mayor alang sa pagtinabangay nga molambo ang masig nila ka Local Government Unit.

Dili gyud maayo nga ang mga opisyal sa lainlaing LGU mag-away kay ang resulta niana, walay maayong koordinasyon ug kitang mga yanong katawhan ang maapike.

Tungod niini, hangyuon nako si Mayor Labella nga tanyagan niya og posisyon ang pipila ka alyado sa iyang kaatbang sa politika nga mga maayong molihok alang sa kaayohan sa katawhan.