Kongreso sa mga itoy
Ang pagdumili ni Presidente Rodrigo Duterte sa pagpili sa sunod nga speaker sa House of Representatives nakapasamot inay nga makapahusay sa linigwatay sa mga nangambisyon—nga pulos niya mga alyado, pulos nangangkon nga iyang gisuportahan, apan pulos napakyas sa pagkuha sa opisyal niyang endorsement.
Ang iyang sugyot nga si kanhi Speaker Gloria Macapagal-Arroyo ang motudlo sa mopuli niya, nga way nakasiguro seryuso ba o atik lang, wa tagda sa mga kongresista.
Kay klaro man ang palabihon ni Arroyo mao ang sakop sa iyang partido nga si Kongresista Martin Romualdez sa Leyte.
* * *
Nidali paghulip sa dakong haw-ang ang duha ka anak sa presidente. Nga sa sinugdanan nagkasungi (si Polong ganahang mag-speaker samtang si Sara nitugpo og laing kandidato) apan sa kapulihay nagkauyon ra ug gani nakigtago na nilang Romualdez ug sa duha ka karibal nga silang Alan Cayetano ug Lord Velasco.
Wa mosalir ang pagsunudsunod sa tulo ni Presidente Duterte sa Japan ug Thailand (gawas sa pagpagawas sa hulagway nga nagpakita nga sikit sila sa presidente).
Ambot unsay mahimo sa ilang pag-amen na sab nilang Sara ug Polong (gawas sa hulagway nga nagpakita nga sikit sab sila sa mga anak sa presidente).
* * *
Gawas nga nimatuod ni nga ang kadagkoan sa House manghod lang og diyutay sa mga itoy sa Malakanyang, nagpakita pa gyud nga mura silang mga bata nga way buot nga di kamao nga mosulbad sa ilang kaugalingong away.
Ang pagpanginlabot na ba lang gyud sa presidente ug mga anak ang makapugong sa pagka bungkag sa makabungog nga mayoriya sa administrasyon?
* * *
Kun di makahimo pagpadaplin sa personal nilang mga interes alang sa ila ra sang mga alyado ug labaw sa tanan sa kaligdong sa ilang institusyon, unsaon man kaha nila pagtabang pagsulbad sa mas komplikado nga mga suliran sa nasud ug katawhan? Ug kun di maka-umol sa ilang panghunahuna sa way paglingi unsay gusto sa ilang padrino ug sa iyang mga anak, unsa may kalidad sa mga balaudnon nga ilang mapasar?
Kun mga sakop ra diay sa Agad-Agad Foundation, unsay may kapuslanan sa ilang pangatungdanan? Nga gawas nga mao ray trabahong mas daghan ang bakasyon, mogasto pa gyod ta og minilyon ka pesos sa matag sesyon?
* * *
- Latest
