Mataligam-an na sang tubig
Karong inanay nang nisaka ang suplay sa tubig sa Metro Cebu Water District (MCWD), labi na sa pahibawo sa PAGASA nga mas daghan ang uwan karong Hulyo kay sa niaging buwan ug nga maangkon na gyod sa Sugbo ang normal nga gidaghanon sa uwan karong Agosto, gikabalak-an nga makalimtan na sab ang kadinalian sa panginahanglan sa pagpangita og dugang tinubdan sa tubig.
May sukaranan ang kahadlok nga sama sa naandan unya na sab mahisguti pagbalik ang pagpangita og malungtaron nga sulbad sa kanihit sa tubig sa sunod nga ting-init o grabeng huwaw.
* * *
Hinaot nga ang kadagkoan sa MCWD nga gipangulohan ni Chairman Joel Mari Yu makakumbinser sa lokal nga mga opisyal sa Metro Cebu sa pagpaluyo sa mga proyekto nga hagbay ra nilang gisugyot pagdugang sa ilang suplay nga karon labihang kuwanga bisan sa katunga lang sa kabalayan sa Metro Cebu:
Higanteng desalination plant sa Lapu-Lapu City nga maka-suplay sa panginahanglan sa tibuok isla sa Mactan nga 80,000 cubic meters matag adlaw; ug
Higanteng dam sa Mananga nga makadugang og 100,000 cubic meters matag adlaw nga suplay sa habagatang Metro Cebu.
* * *
Apan inutil ang MCWD kon babagan sa lokal nga mga opisyal ang ilang mga proyekto. Sama sa nahitabo sa Opon diin wa mahinayon ang pagkuha unta sa MCWD og 5,000 ngadto sa 10,000 cubic meters matag adlaw gikan sa Mactan Rock Industries Inc. tungod sa pagsupak ni kanhi Mayor Paz Radaza.
Ang maayong balita mao nga bag-o nang mayor sa Opon. Ug masaligon ang MCWD nga mas makasabot sa kamapuslanon sa proyekto si Mayor Ahong Chan.
* * *
Mas dako ang problema sa MCWD sa pagpatuman sa P6.5 bilyones nga Mananga High Dam project, bisan sa interes sa tulo ka higanteng kompaniya sa pagtukod sa proyekto nga unang gisugyot ni anhing Serging Osmeña niadto pang dekada 50.
Kay kinahanglan nilang kumbinsihon silang Cebu City Mayor Edgar Labella, Talisay City Mayor Samsam Gullas ug Cebu Governor Gwen Garcia. Mapadaplin ba sa lokal nga mga opisyal ang pamolitika ug tugotan ang proyekto pinaagi sa public-private partnership nga giduso sa mga sakop sa MCWD board mga tinudlo ni kanhi Cebu City Mayor Tommy Osmena?
* * *
- Latest
