Pagbantay mayor

Tan-aw nako, kon ayuhon lang gyud pagdumala ni Mayor Edgardo Labella ang pagpalambo sa dakbayan sa Sugbo, makuli na nga makabalik pa si kanhi mayor Tomas Osmeña sa samang pwesto.

Daghang mga maayong programa si Labella ug naglaum ko nga tumanon niya ang iyang mga plano. Ang tambag lang nako nga magbantay siya kay siguradong dunay mga tawo nga nahiubos kaniya ug mangita’g paagi aron siya malukapa.

Sila mao kadtong mga tawo nga nagtuo nga mabutang sila sa mga sensitibong puwesto sa City Hall apan wala makalingkod kay si Labella mihukom nga siya gyud ang masunod kon kinsa ang iyang saligan sa mga katungdanan.

Aw, nakabantay na tingali mo nga daghan sa mga department head ni Vice Mayor Michael Rama kaniadto nga wala na matudlo sa ilang mga pwesto.

Para kanako, husto ang gihimo ni Labella nga hatagan og higayon ang mga bag-o nga personalidad pagprobar nga sila takus sa katungdanan.

Sama gud diha sa Lapu-Lapu City, si Mayor “Ahong” Chan mikuha og mga bag-ong opisyal nga ang uban dili gani taga Lapu-Lapu kay misalig man sila sa ilang abilidad.

Sa Mandaue City hinuon, sagad taga Mandaue gyud ang gipanguha ni Mayor Jonas Cortes. Dili na man gud malalis nga batid na kaayo si Cortes sa panerbisyo sa kagamhanan kay nagsugod siya konsehal pa, unya nahimong mayor ug kongresista, ug karon nakabalik na sab pagka mayor.

Dako ko og pagsalig ni Cortes nga mapalambo gyud niya ang Mandaue City ubos sa iyang pagdumala, ilabi na nga siya sayon kaayong maduol sa mga yanong lumolupyo sa Mandaue.

Sa Talisay City, batan-on sab ang mayor nga si Samsam Gullas ug daghan pa kaayo og mga maayong plano alang sa kalamboan sa dakbayan.

* * *

Balik sa siyudad sa Sugbo, gidayeg nako si Mayor Labella kay gitan-aw gyud diay niya ang 21 ka tuig na nga problema sa mga vendors sa Carbon Public Market nga gikan niadtong 1998, wala gyud kapulihi ang public market building nga nasunog.

Tiaw mo, gisugdan ang pagpatukod sa public building gikan sa administrasyon ni kanhi mayor Alvin Garcia apan wala ipadayon dihang mibanos sa City Hall si kanhi mayor Tomas Osmeña.

Gusto unta ni kanhi mayor Mike Rama nga mapadayon ang proyekto atol sa iyang administrasyon, apan gikiha si Rama ni Osmeña kay kuno daghang nalapas nga balaod ang pagpili ni Rama og kontraktor.

Unya nibalik si Osmeña pagkamayor niadtong 2016, apan napupos na lang ang iyang termino niadtong Hunyo 30, wala gyud mapalihok ang pagpadayon sa proyekto. Pastilan gyud.

Unta, mapadayon na gyud kini ni Mayor Labella aron mobalik na ang kahapsay diha sa Carbon Public Market.