Wala kadawat sa kapildihan

Sugod karong udtong tutok molingkod na ang bag-ong mga napiling opisyal sa gobyerno. Apan tungod kay Domingo, way opisina, ang opisyal nga unang adlaw sa ilang trabaho magsugod ugma. Sa mosunod nga tulo ka tuig, ang lokal nga mga opisyal nga atong gipili niadtong nakalabay nga eleksiyon sa Mayo, maoy modumala sa renda sa pangagamhanan.

Sila maoy kapitan nga maghatag og direksiyon asa paingon ang atong tagsa-tagsa ka mga local government unit.

Sa mga opisyal nga magsugod na sa ilang gimbuhaton, dako ang hagit nga inyong giatubang. Ug hinaot sa kanunay ang interest sa publiko ang mopatigbabaw sa tanang desisyon nga inyong pagahimoon. Alang sa mga first-termer, karon magsugod ang unang adlaw sa inyong kampanya nga maoy magsilbi ninyong hinagiban sa moabot pa nga mga eleksiyon hangtud mapupos ang tulo ka termino nga gitugot sa atong Batakang Balaud.

Alang sa mga pildero hinaut inyo nang nadawat ang kamatuoran. Tinuod sakit ug lisud dawaton ang kapildihan apan ayaw himoang mas lisud alang nimo ang pagbangon sa kaparutan pinaagi sa pagbuhat sa mga butang nga makapuling sa mata sa publiko. Pananglitan, gihimulbolan ni kanhi mayor Tomas Osmeña ang iyang buhatan sa wala pa matapos ang iyang termino.

Labihang kuganga sa mga sakop sa transition team ni Mayor Edgardo Labella dihang ilang giduaw ang opisina sa mayor tungod kay nalangkat na ang mga kisami ug tiles sa iyang sawog. Wala nay lamesa ug lingkuranan nga nagpabilin.

Matud ni Osmeña nga personal niyang kwarta ang gigamit sa pagpa-renovate sa iyang opisina tungod kay wala siya hatagi og budget sa konseho nga kanhi gipangulohan ni Labella.

Mamahimong personal nga kwarta ang iyang gigasto pagpaayo sa maong opisina, apan grabe na man pud lakip ang kisame ug tiles iyang langkaton.

May rason og iyang dad-on ang mga lamisa, lingkuranan, cabinet ug uban pa nga mga furniture nga personal, apan ang paglangkat sa kisame ug tiles sobra ra pud.

Labing siguro paglingkod niya kaniadto dunay kisame ug tiles ang maong opisina. Mahimong iyang gipaguba ug gipailisan sa iyang gusto apan labing siguro dili ni maoy hitsura sa maong buhatan kaniadto. Kun buot man niyang bawion ang tanan niyang personal nga gamit, angayan pud tingali nga iyang gibalik ang karaang hitsura sa maong opisina.

Sa gihimo ni Osmeña iyang gihimong lisud ang iyang pagbangon sa kaparutan. Ang iyang gihimo naghatag og hulagway ngadto sa publiko nga hangtud karon wala pa siya kadawat sa kapildihan.