Pagmika sa FDA
Hangtod karon nagpabilin nga pakyas ang Food and Drug Administration (FDA) sa paghingan sa brands sa suka nga nakaplagan nga peke.
Sukwahi sa ilang pasalig nga idili na ang pagbaligya sa peke nga mga suka sa mga tindahan, ang kadagkoan sa FDA nagdumili sa pag-ila sa 80% sa 360 ka brands sa suka nga gisagolan og kemikal ug busa di haom sa pagkonsumo sa publiko.
Wa mokihol ang FDA bisan giapura na sila ni Agriculture Secretary Manny Piñol sa paghingan og mga ngan aron nga di maglibog ang mga konsumidor.
* * *
Lima pa ka brands sa suka ang gitumbok sa FDA nga peke dul-an usa ka buwan na ang nilabay. Sukad sa unang semana sa Hunyo wa na silay pahibawo nagpadayon pa ba ang pagsusi sa ubang brands sa suka.
Klarong di ganahan ang FDA nga modason sa pakisusi sa Philippine Nuclear Research Institute (PNRI) sa Department of Science and Technology (DOST) sa peke nga mga suka.
Mao ni hinungdan nga kutob ra gyod intawon sa tag-an tag-an ang mga konsumidor kon peke o tinuod ba ang ilang kinaham nga suka.
* * *
Mora sang umang ang lihok sa FDA sa pagdili sa pagbaligya sa linata nga mga karneng baboy gikan sa mga nasud nga natakdan sa African Swine Fever (ASF). Septiyembre pa sa niaging tuig nga gipahamtang ang ban sa Department of Agriculture (DA).
Apan nagpaabot ang FDA og walo ka buwan una nidason sa ban sa niaging buwan.
Ug naabtan ang FDA og laing usa ka semana una nakapagawas sa listahan sa gi-ban nga brands sa mga linata.
* * *
Napugos ang FDA paglihok human nitiyabaw ang dagkong mga negosyante nga sakop sa Philippine Association of Meat Processors Inc. (PAMPI) nga gipangulohan sa Sugbuanong si Boy Tiukinhoy nga maalkanse sila kon likayan sa mga konsumidor ang tanang linata nga mga karneng baboy.
Ang mosunod maoy giila sa FDA nga gikan sa China ug ubang kanasuran nga may ASF: Narcissus, Heaven Temple, Ma Ling, Shabu Shabu, Sol Primo, Wang Taste of Korea, Highway, Sky Dragon ug Weilin.
Karon mangumbinser ta og dagkong negosyante sa pagreklamo sa kalibog sa pag-ila sa peke nga mga suka aron nga mokihol sang FDA.
* * *
- Latest
