Magpaabot pa ta sa Bag-ong Tuig
Unya pa sa Enero 2, 2020 mahunong ang wa kinahanglanang kahasol sa pag-usab-usab sa numero sa telepono kun mobalhin og laing network.
Kini bisan nahuman nang implementing rules and regulations (IRR) niadtong Martes ug hingpit nang mapatuman ang Mobile Number Portability Act (Republic Act 11202) sa sunod buwan.
Ang hinungdan? Nangayo ang higante nga mga kompaniya sa telepono og dugang unom ka buwan nga lugway sa pagkontrata og mobile number portability service provider (MNPSP) nga maoy mopahigayon sa pagbalhin sa numero sa subscribers gikan sa usa ka network ngadto sa lain.
* * *
Ubos sa balaod, nga hagbay rang gipatuman sa ubang kanasuran ug busa di angay nga tugotan pa ang dugang kalangay, ang Globe, PLDT ug ang ikatulong kompaniya sa telepono, ang Mislatel, kinahanglan nga magkauyon unsa ang gamiton nga teknolohiya sa mobile number porting ug sa kompaniya nga mopatuman ini. May duha ka mahinungdanong tugon:
• Una, kinahanglan nga mabalhin na ang numero sa subscriber sa laing network sud lang sa duha ka adlaw; ug
• Ikaduha, way bayranan ang subscriber bisan usa ka dako, sa ato pa hingpit ni nga libre.
* * *
Supak ang mga telco nga librehon ang mobile number porting services. Gani, may mga pasumbingay na nga mahimong mopasaka sila og kaso sa korte aron kapugngan ang pagpatuman sa balaod.
Ang makahahadlok mao nga ang higanteng mga telco nga modangop sa korte tagsa rang mapilde.
Malampuson silang nipugong sa nangaging mga sugo sa National Telecommunications Commission (NTC) nga nipabor sa mga konsumidor, sama sa paglaslas sa bayranan sa matag text message ngadto sa P0.80 inay P1 ug sa voice call sa matag duha ka segundo inay sa matag minuto.
* * *
Di makapangangkon ang mga telco nga ang libreng mobile number porting services makapa-alkanse nila, mas katuohan nga maka-iban sa dako nilang ginansiya.
Apan may sukaranan ang mga pagduda nga ang mosunod maoy mas dagkong hinungdan sa ilang pagsupak sa paghimong sayon sa proseso:
• Di na matanggong ang subscribers sa kahasol sa pag-usab-usab og numero nga maoy nakapugos nila sa pag-antos sa bati nga serbisyo; ug
• Mapugos nang mga telco sa pagpalambo sa ilang serbisyo kay mas dali na silang biyaan sa subscribers.
* * *
- Latest
