9-anyos naghikog o gipatay?

Nagbilin og dakong tanghaga ang kamatayon sa 9-anyos nga si Dep Leppard Seclahon sa Malhiao lungsod sa Badian.

Dunay dili makatoo sa nahitabo sa bata kinsa natook sa duyan ang liog niini hinungdan sa iyang kamatayon.

Biyernes sa hapon napalgan sa iyang apohan ang bata nga natook na sa duyan sulod sa usa ka payag nga nagluhod na.

Sa iyang pangidaron kun aksidenteng nabitik ang liog sa bata ugaling nagduwa kini mahimo ra gyud siguro niyang hubaron ang pisi.

Matud sa amahan sa bata nga walay indikasyon nga makahuna huna sa paghikog ang anak kay sama sa ubang bata bibo ug sipat kini.

Nagtubo ang bata sa side sa iyang inahan kay wala man mag-ipon ang iyang mga ginikanan sukad sa pag gawas niini sa sabakan sa iyang inahan.

Apan bisan pa man niini nagtubo ang bata nga gisuportahan sa iyang amahan ug sa mga tawo nga iyang mga kadugo.

Dili malikayan sa usab ilabi na sa amahan sa bata nga motumaw ang katahap nga naay nagpaluyo sa kamatayon niini.

Midangop ang pamilya sa bata kang Vice governor Agnes Magpale nga maoy chairperson sa Provincial Commission for the Welfare of Children PCWC kinsa mipasalig nga abagahon sa Kapitolyo ang tanang galastohan.

Diha diha dayon gi-refer sila sa National Bureau of Investigation aron masuta gyud unsay nahitabo sa bata.

Ugmang adlawa gikatakdang i-autopsy sa NBI ang bata didto sa Badian.

Samtang ang Cebu Provincial Police Office mimando usab og imbestigasyon sa kamatayon sa bata.

Gani plano usab nilang i-autopsy sa Regional Crime Laboratory ang 9 anyos nga si Dep Leppard.

Mas maayo hinoon nga matutokan sa mga ahensya sa gobiyerno ang nahitabo aron mahatagan og hustisya kon ugaling dunay foul play ang iyang kamatayon.