Mga maayong proyekto ipadayon

Nalipay ko sa pasalig ni Incoming Cebu City Mayor Edgardo Labella nga ipadayon niya ang mga maayong programa ni outgoing Mayor Tomas Osmeña, apan himoan lang niya og gamay’ng kausaban.

Mao na ang husto nga buhaton sa usa ka maayong mayor nga ipadayon ang mga maayong proyekto sa iyang gisundan, basta makahatag lang og kaayohan sa katawhan.

Sama sa pagpanghatag og tambal sa siyudad ngadto sa mga “indigent families” nga adunay inadlaw nga panginahanglan sa tambal, angay kini nga ipadayon, apan himoan lang og kausaban.

Bisan ako wala makauyon sa pamaagi ni Osmeña nga kada adlaw gyud ihatag ang mga tambal ngadto sa pasyente, unya ang gitugyanan pa gyud mga out-of-school youths.

Hasol kaayo ang maong paagi uy, kay tiaw mo, diri sa among dapit sa bukid, kada adlaw motungas ang mga tighatud sa tambal?

Mao na nga daghan ang mga tighatud nga miundang sa ilang trabaho.

Suporta ko ni Labella nga usbon ang paagi niini kay mahimo man nga ang mga tambal ihatag sa pasyente kada semana, o kaha kada buwan, unya ang tugyanan sa paghatud kadto gyud nga may medical backgrounds.

Unya, angay gyud usab nga suportahan ni Labella ang pagdumala sa Cebu City Public Library kay nakita gyud nako nga pwerteng daghana nga mga nakabenepisyo niini. Kanunay puno ang library sulod sa 24 oras.

Apil nga maayong ipadayon ni Labella ang pagpahigayon og libre nga Japanese Language Class diha sa City Public Library kay dako kaayo kini og matabang sa mga gusto nga motrabaho sa Japan.

Ang Japanese Language instructor nga si Jazzy Sensei wala gyud magpabayad sa iyang serbisyo aron lang gyud makakat-on ang iyang mga estudyante pagsuwat ug pagsulti’g Hinapon, apan kinahanglang suportahan kini sa City Hall bisan sa ginagmay’ng panginahanglan.

Nalipay ko kay si Labella miawhag kanako nga hisgotan namo kining maong isyu kay nasayod man gyud ko niini isip usa sa mga tinun-an sa Japanese Language Class.

Sa sinultihan namo didto sa Japan, “Watashi wa Nihongo wo benkyou shimasu.” Hehehehe.

* * *

Motoo ko nga dunay mga alyado sa BOPK nga mamiya sa ilang grupo ug moabin na ni Labella.

Angay man sab gyud nga suportahan si Labella aron nga molampos siya sa iyang mga gustong ipatuman dinhi sa dakbayan.

Angay’ng pangitaan gyud og sulbad kining problema sa baha, traffic, basura, pagdagsang sa mga illegal nga sugal, ug uban pa nga makahulga sa kinabuhi sa katawhan.