Happy Father’s Day

Adlaw karon sa paghandom, giunsa ta pagmahal-agak sa atong amahan gikan sa pagkahimugso nato hangtod sa higayon nga kita nakat-on pagbarog sa kaugalingon tang mga tiil.

Tam-is gihapon pamation kadtong mga palad sa atong Tatay nga mosapnay sa linghod pa natong kalibotan, diin mainampingon mopasakay-pahimutang nato sa duyan nga puno sa pagpangga dungan ang pagkantag mga love songs nilang Mat Monroe, Frank Sinatra, Paul Anka ug Andy Williams hangtod kita makatulog.

Dinhay usa ka gabii, 6-anyos pa ko niadto, nga sayo kong gipakatulog sa akong Tatay. Ang iyang bus-ok nga bukton mao gyuy iyang gipaunlanan nako aron kon mobangon ko, dali ra siyang makamatikod ug masundan sa iyang panan-aw asa ko mopaingon?

Uso man god kaniadto ang libreng sine sa dakong plasa sa among lungsod nga gipasiugdahan sa mga dagkong kompaniya sa sabon, toothpaste o gatas.

Kaming mga bata kondisyonan dayon sagad sa mga Tatay nga kinahanglang matulog sa adlawan aron tugotan nga makatan-aw inig ka gabii. Ang nahitabo sa akoa, kay wala ko makatulog sa adlawan. Mao nga pagka gabii, gidulgan gyod ko niya paghigda aron bantayan nga dili makalighot.

Apan ambot, tungod ba kaha sa kakapoy sa iyang bug-at nga trabaho, nakatulog siya. Busa, nakalugar gyod kog adto sa plasa aron motan-aw’g sine. Apan naunsa ba, nga sa akong pag-abot didto, nagdinaganay bitaw nang mga nanan-away. Diay, may nagdinunggabay nga mga hubog.

Taudtaod, miabot akong Tatay, kinsa didto milahos sa nahimutangan ni Nanay, kinsa nanindag mani. Gitug-anan niya si Nanay nga nawala kuno ko sa iyang tupad samtang nagdulog mi sa amoa. Ug maoy rason nganong ania siya.

Haskang sarapsarap og pinangita ni Tatay nako. Tiaw bay, ang kaguliyang sa nagdinaganay nga mga tawo nagsige pa. Nabalaka sila basig mayatakan ko.

Wa sila masayod nga diha ra ko ilawom sa lamesang gitindahan ni Nanay. Ug dihang kalit kong migakos sa paa ni Tatay, diha pa sila mahuwasi.

Nagtuo kong bunalan ni Tatay, lusion akong bugan ug dalunggan. Pastilan, gikugos man hinuon kong Tatay ug gigakos pag-ayo, diin didto akong nabati ang kainit sa matuod nga gugma sa usa ka amahan.

Sa mga amahan, nga nagmahal namong inyong  anak, Happy, Father’s Day.