Paglamanohay

Nindot kaayong tan-awon ang napatik sa The Freeman nga paglamanohay nila ni Mayor Tomas Osmeña  ug Mayor-elect Edgar Labella atol sa niaging Independence Day celebration.

Ingon unta niini ang hulagway sa politika sa atong nasud.  Dili magdinumtanay. Tapus sa eleksyon amigo na ang tanan.

Hinaut nga ang maong gesture sa duha ka leader sa politika sa atong dakbayan makahatag og panig-ingnan sa ubang mga politico nga ang uban kanila nagplano unsay ilang buhaton ngadto sa mga buhatan og mga empleyado sa gipilde nilang mga kaatbang.

Sa ato nang gibalikbalik dinhi, niadtong mga mananaug, be magnanimous in victory. Inay nga ang ilang pagdaug himoon nga okasyon sa pagpanimalos.

Matud ni Labella: “I admired Mayor Tom for being gracious in shaking hands and gracious in the result of election.  I shared with his sentiments regarding the significance of the Independence Day.  But of course, we still have so many problems to tackle like our very social and political imbalance.”

Sa related nga kasayoran, giingon nga ang magtiayong Osmeña wala na magplano nga molansar pa sa mosunod nga mga eleksyon, ug lagmit mopahulay na gikan sa politika.

Bitaw, kun ako say anaa sa kabutang sa mga Osmeña, mao sad nay akong buhaton. Retire from politics.

Sa ato na usab nga nahisgutan dinhi, nga usa kuno sa depekto natong mga Pinoy, kay tapus sa presidential election pananglitan,  ang buhaton sa mudaog nga kandidato mao ang dismantle sa tanang nahimo sa napilde nga kaatbang. 

Ug magsugod siya sa bag-o niyang mga gimbuhaton. Sa America,  ilang ipadayon ang mga proyetko sa nagpilding incumbent president, kay alang kanila, ang existing nga mga programa ug  proyekto, dili personal nga proyekto sa incumbent president, kundili, proyekto sa katawhan sa America.

Busa ila kining ipadayon.

Atong hinumdoman nga despite sa atong kasuko ni Marcos, daghan kaayo to siya’g mga nahimong maayo  alang sa katawhan.

Apan pagpuli ni Cory, ang tanang nahimo ni Marcos, iyang gipabali-wala, apan wala siyay gipuli nga mas maayo pa kay sa nahimo ni Marcos, in terms of development.

Anyway, history na to. Manghinaut lang ta nga kining bag-ong napili nga mga suloguon sa lungsod, mao untay mopatigbabaw ang tiunay nga pag-alagad over sa personal nilang intereses.  Ug kun empleyado pa ako karon sa city hall karon ug dili regular, mangulbaan gyud nga lagmit makulban sa kaldero kay namilegro kadtong gidudahan nga nangampanya batok sa Barug-PDP Laban.   

Ang The Freeman nagkanayon:  “ The days are numbered for City Hall employees and barangay workers who campaigned for outgoing Cebu City Mayor Tomas Osmeña in the last elections.”

Kuyaw no? Unsaon ta man, ingon man gyud niini ang politika sa atong nasud. Apan ang nakadaut pud kay ang uban natong mga empleyado sa gobiyerno maninuod man usab og pangampanya.  Di sad ni husto. Being in government they’re not supposed to get involved in politics.  

Matud ni Labella: “I don’t mind if they voted in favor of the opposite side but if they campaign hard and involved in mudslinging and character assassination, of course, these are considered because it is not fair to our supporters.” 

Correct ka dyan Ed.