Ganbatte kudasai

Ang tanang commissioner sa Commission on Elections mihukom nga invalido ang Certificate of Candidacy (COC) ni Konsehal Alvin Arcilla ug nagpasabot kini nga dili siya opisyal nga kandidato sa miaging eleksyon.

Gipaabot sab gani nga ang Comelec en banc nga gipangulohan ni Sheriff M. Abas mopagawas na usab karong sunod semana og susama nga hukom ngadto kang Konsehal Sisinio Andales

Sila si Arcilla ug Andales, mga kaalyado ni Mayor Tomas Osmeña, gipetisyonan sila sa usa ka Allen Canoy nga ipakanselar ang ilang COC kay kuno dili na sila makalansar para sa miaging eleksyon kay nakahuman na sila og tulo ka termino.

Tuod, milampos si Canoy ug ang Comelec-Manila mideklarar nga dili na makadagan pagbalik sa sama nga pwesto sila si Andales ug Arcilla. Ang hukom sa Comelec First Division, giuyonan sa tanang commissioners.

Daghan ang nagtuo nga kun matangtang sila si Arcilla ug Andales, ang mopuli kanila mao sila si Konsehal Jerry Guardo ug Konsehal Joel Garganera, nga wala makadaog sa miaging eleksyon, apan anaa sila sa ika-siyam ug ika-napulo nga pwesto.

Pero matud ni Arcilla nga moapelar dayon siya sa Supreme Court aron nga lantugion ang hukom sa Comelec nga iyang gihulagway nga sayop.

Ang argumento ni Arcilla ug Andales nga sila wala gyud makahuman sa ilang tulo ka termino kay nasuspenso man sila kaniadtong 2016, apan giyam-iran ra sa Comelec ang ilang argumento.

Buyno, ang isyu karon kun makakuha ba si Arcilla ug Temporary Restraining Order (TRO) gikan sa Supreme Court aron pugngan nga makalingkod si Guardo isip puli kang Arcilla.

Matud ni Arcilla nga kun pananglit ang Supreme Court mohukom gyud nga dili siya palingkuron bisan og siya nakadaog sa miaging eleksyon, kinahanglan unta nga ang mopuli kaniya, gikan sa BOPK ug dili kadtong ika-9 ug ang ika-10.

Buyno, paabuton nato kun unsay sangpotan niining mao nga isyu. Ang akong ikasulti ngadto sa mga nalambigit niining maong isyu, fight lang gyud! Sa sinultihan pa sa mga taga Japan, ganbatte kudasai!

* * *

Si Konsehal Jerry Guardo mipahibalo na nga mosuporta siya ni Mayor-Elect Edgardo Labella kun molingkod na kini sa katungdanan. Usa kini si Guardo sa mga konsehal sa BOPK nga gidungog nga moipon sa grupo ni Labella.

Sigurado gyud ko nga kun makalingkod na si Labella sa katungdanan, daghang konsehal nga alyado ni Mayor Osmeña ang motapon sa pikas grupo. Tungod kini kay si Labella mahigalaon nga pagkatawo.

Aw, sumala gud, nakakita man mo sa mga hulagway nga kaniadtong Miyerkules, gisugat ni Labella si Osmeña gikan nga nag-speech ug gitunol ang iyang kamot ug sila nagkalamanohay.