KAPA mikapakapa

Nindot ang tumong sa Kapa-Community Ministry International kay kuno ang Kabos Padatoon. Lalim bay, sa P10,000 nga kinagamyang starting investment sa magpamiyembro, makadawat kinig 30% nga tubo or P3,000 kada bulan. Ug matud pa, for life pa gyud. Pagkanindot nga investment!

Matud pa sa usa ka ginang, nga sobra ka dato kuno ang nagdala sa Kapa Ministry. Ug misyon niini ang pag-apud-apod sa nagbahang kayamanan nga nahuptan ngadto sa mga tawong nanginahanglan.  Mao ba? Unya, nganong papundohon pa man ang magpasakop og kantidad nga dili momenus sa P10,000 isip donation, diin ang 30% interest gibunyagan pog love gift?

Pagkasayod sa bana nga iyang misis mi-invest sab og P10,000 sa Kapa, puwerteng sukoa! Nganong misakay kuno sa maong ilad?

“Unsay ilad? Nagsige na man ko’g dawat og P3,000 kada bulan. Tulo na ka beses. Sa ato pa, P9,000 nay akong nabawi. Ug sa sunod bulan, may P3,000 na pUd kong makuha. Pero, unsaon man ni pagkuha nga ipasira na man ni Pres. Duterte ang Kapa? Nalugi pa nuon kog P1,000.” Mao ni dark side sa paggukod sa gobiyerno niining Kapa nga gidudahang mipahigayon og engrandeng scam or swindling business sa atong nasod. Kay imbes, magpadayon na untag enjoy sa pagdawat ang mga miyembro sa dakong bunga sa ilang gitanom, naputol na hinuon tungod sa gobiyerno.

Karon, kinsa man ang mahayan sa mga miyembro: ang Kapa nga sukad wala pay undang sa pagsigeg hatag sa 30% nga tubo, o kining gibuhat sa gobiyerno ngadto sa Kapa nga maoy nakapapugong sa ilang dawatonon?

In fairness, wala pay miyembro nga mireklamo batok sa Kapa Ministry. Kini tungod kay unsay gisaad sa Kapa ngadto nila, gituman.

Sa bagay, obligasyon sa gobiyerno ang pagprotehir sa katawhan batok sa mga daotan. Apan daotan ba ang manghatag og 30% nga tubo kada bulan?

Sa laktod, wala pay nasamad sa mga miyembro sa Kapa nga angay hatagag tambal dayon sa gobiyerno. Unsa man ang tambalan nga wala man intawoy nangasamad? Tingale, kun aduna nay reklamo. Kana, mao na ang tukmang panahon.

Kay tan-awa ra gud unsay nahitabo? Ning pagmando ni Tatay Digong nga ipasira gilayon ang Kapa, haska gyung luoya. Puwerte intawong kapakapa!