Pagbudhi ni Briones
Palihug tabang og pangaliya nga di kopyahon sa hakog nga mga negosyante sa Sugbo ug Central Visayas ang paglubog ni Education Secretary Leonor Briones sa awhag sa mga magtutudlo alang sa makiangayon nga usbaw sa ilang suholan.
Kay, niduaw ra ba si Briones sa Sugbo sa niaging adlaw, kuyaw’g masudlan sab og bakukang ang pangutok sa mga representante sa mga kapitalista sa wage board, manamilit na lang tang daan sa bisan unsang kahigayonan nga makaangkon og laing uminto sa suholan atubangan sa nisulbong nga presyo sa inadlaw nga mga palaliton.
* * *
Inay dasonan ang mas dakong suholan sa nagtiyabaw niyang mga sakop, si Briones nigamit sa iyang kasuhito sa mga numero sa pagpaburot sa papel sa binuwang suholan sa mga magtutudlo ngadto sa P30,873.00 inay sa aktuwal nga gidawat sa entry-level teachers nga P20,754.00.
Nasakpan sa Alliance of Concerned Teachers (ACT) nga gilumpong ni Briones pagkuwenta sa ilang suholan ang mosunod: P6,000 nga clothing allowance; P3,500 nga chalk ug instructional materials allowance ug bisan ang P500 nga medical examination allowance nga wa pay seguro ihatag ba.
* * *
Kinopya ra hinuon ni Briones ning binuanga. Mao say maniobra sa higanteng shopping malls aron pagpaburot sa ilang ginansiya:
Gipabayad ang tanang namaligya sa tanang gastohan, apil nang kuryente, tubig ug computers sa administrative offices, patong sa naandan nga dagkong abangan.
Kun madasig ang mga negosyante pagsunod ni Briones, moburot sang kuwentada sa atong suholan kay ilumpong na pagkuwenta ang konsumo sa mga kompaniya sa suga, aircon, internet ug security ug janitorial services.
* * *
Nakadugang sa kalang-og sa maniobra ni Briones, nga inay motudlo sa tinarung nipasundayag hinuon og minaru, maong iyang pagbalik-balik nga ang mga bayani nga atong gipasidunggan sa niaging Independence Day nagsakripisyo sa way pagpaabot og bugti.
Hinaot nga may makapahinumdom ni Briones (1) nga dunay tibuok kalibotan nga kalainan sa paggamit sa balaanong gasa sa pamuo aron pagbuhi sa mga sakop sa pamilya ug sa pagbarug alang sa mas dagkong kawsa; ug (2) nga bisan ang labing bantogan nga mga bayani nakigbisog sab alang sa mas makiangayon nga suholan ug benepisyo alang sa mga anak sa singot sa ilang panahon.
* * *
- Latest
