Sambingay

Wala mabatasan ni Gobernador Hilario Davide III ang pagtambong sa matag Lunes nga flag ceremony sa Kapitolyo.

Sukad sa iyang paglingkod isip gobernador, maihap lang sa tudlo nga siya miapil sa mga empleyado ug opisyal sa probinsiya sa matag-semana nga tulomanon.

Igkita lang si Davide kun duna siya gustong ipaabot ngadto sa mga kawani. Busa dihang mibutho siya sa flag ceremony niadtong Lunes nahibawo nang daan ang mga kawani nga duna siyay gustong ipahibawo.

Tuod human sa flag ceremony, mihatag si Davide sa iyang mensahe ngadto sa mga empleyado. Nagpasalamat sa suporta sa iyang administrasyon.

Apan daghan ang natingala nga diha sa iyang pakigpulong mipasambingay siya sa usa ka damgo.

Matud niya nga nagdamgo kuno siya nga labihan nilang away ni provincial accountant Marieto Ypil.

Sigun niya wala siya masayod unsay hinungdan ug nganong si Ypil pud ang iyang gidamgo.

Apan ang tinuod gipaagi lang niya sa sambingay sa damgo ang iyang pagpanghulga ngadto ni Ypil.

Sa tinuod labihang sukoa ni Davide kang Ypil tungod sa pagdumili niini pagpirma sa mga gikinahanglang dokumento aron hatagan sa P194 milyones nga pasiunang bayad ang kontraktor sa kontrobersiyal niya nga Capitol Resource Center project. Di mopirma si Ypil tungod kay duna nay pasidaan ang mosunod nga administrasyon nga dili niini ipadayon ang proyekto. Unsa may kapuslanan nga mohatag og advance payment ang probinsiya kun sayod silang daan nga dili ipadayon ang proyekto?

Tungod sa iyang kasuko mihulga si Davide nga ikiha og insubordination si Ypil.

Wala ba mauso ang delicadeza alang ni Davide? O wala lang gyud siya makapalit og uwaw?

Nganong mamugos man siyang bayran og pasiuna ang kontraktor nga siya mismo sayod sa baruganan ni governor-elect Gwen Garcia. Ang nahabiling pipila ka adlaw sa transition period angayang gamiton sa pagpangandam alang sa hapsay nga turnover sa mosunod nga administrasyon.

Ug sugo sa maayong pamatasan ug delicadeza dili na angayang mohimo pa og ingon niini nga mga transaksiyon si Davide.   Tungod sa iyang pagpangugat nga ipadayon ang proyekto ug bayran og pasiuna ang kontraktor dili kalikayan ang pagduda nga duna siyay dakong interest sa maong transaksiyon.