EDITORYAL - PhilHealth giilad sab

Usa sa mga labing dakong kakuwang sa gobiyerno sa Pilipinas ang maayo ug libreng health insurance hinungdan nga daghang mga kabus ang padayong nag-antos sa ilang mga balatian tungod sa kapobrehon.

Dihang natukod ang PhilHealth Insurance Corp. nakatabang kini og dako sa katawhan. Kay duna nay tsansang makapahiling sa mga doktor ug espesyalista ang mga kabus pinaagi niini.

Ilabi na kadtong dunay mga sakit nga nagkinahanglan og dagkong gastos sa maintenance sama anang dialysis tungod sa sakit sa kidney.

Dili tiaw nga kwarta ang gikinahanglan aron malugwayan pa og pipila ka buwan ang kinabuhi niadtong nagusbat na ang kidney ug nakatabang niini ang PhilHealth.

Apan kun hain ang kwarta toa man sab magtapok ang mga kurakot. Adto man sab mangita og buslot aron suyopon ang kwartang dili ilaha sama niining nasakpang mga ‘ghost dialysis’ nga giingong gibayran sa PhilHealth.

Matud pa nga nagbayad karon ang PhilHealth aning usa ka dialysis center bisan pa og patay na ang pasyenteng ilang gitambalan.

Seryuso kini nga pagpangawkaw sa salapi sa katawhan ug angay lang gyud imbestigahan ug masilotan.

Ang PhilHealth mipasaka na og kaso batok sa WellMed Dialysis and Laboratory Center sa Novaliches, Quezon City niadto pang Nobiyembre tungod sa misrepresentation and falsification.

Matud pa nga dunay nigawas nga report nga ang maong kompanya padayong nagkolekta og bayad niadtong pasyente nga niadto pang 2016 diay namatay. Ang maong dialysis center nagsige pa gihapon og file og claims sa PhilHealth.

Namatay na ang pasyente apan wala pa sab kapahuway ang PhilHealth pagbayad sa padayong pagtambal sa nitaliwan nga pasyente. Maayo nalang nga nasakpan.

Pila pa kaha ka mga ingon niini nga mga kompanya ang nagbuhat og ingon niini nga modus operandi? O mga gagmay lang ba kahang klinika sama niini, ang mga dagkong tambalanan kaha?