Bawal Bastos Law, dakong tamparos

Gikahinangop sa taga Commission on Human Rights ang gipasiugdahag panday nilang Senador Riza Hontiveros ug Akbayan Rep. Tom Villarin nga balaod - ang Safe Streets, Public Spaces and Workplace Act, o gianggaan usab og Bawal Bastos Law, diin klaro kaayong gitumong pabor ngadto sa mga Lesbians, Gays, Bi-sexual ug Trans-gender (LGBT) aron maprotektahan ang ilang katungod isip new species ning nagkamoderno tang panahon, diin ang gidili sa Ginoo nga pag-usab sa ilang bayhon giplanohang buhatan gyog balaod  sa tawo nga puwede ra. Bahala nag, motiyabaw ang Simbahang Katoliko sa pagpinugong.

Sa mga Kongresista ug Senador, kinsa nangusog pagpanday’g balaod nga itugot na ang deborsiyo ug same sex marriage sa Pilipinas, hinaot unta makahinumdom sila: nga kanang gahom, talento ug abilidad nga anaa nila, ang tanan gikan na sa Ginoo. Gipahulaman ra kini aron ipaambit ngadto sa isigkatawo nga nanginahanglan subay sa Iyang sugo. Oras nga gamiton ni sa paagi nga nahisupak sa Iyang gusto, bawion ni Niya tanan lakip na kadtong kataposang gamay nga naa nimo ug Iya ning ihatag ngadto sa adunay daghan. Sa laktod, mahimo ka nang walay bili. Ug itambog ka na lang ngadto sa kalayo sa impiyerno.

Lainlain ang klase ug estado ang naa sa maong hugpong. May desente. Duna poy pasaway. Sagad sa mga desente, guwapa kaayo manghindik ug sosyal manglihoklihok. Lupigon pa ang tinuorayng babaye. Resulta? Gihangaan sa mga lalaki.  Girespeto. Gi-lib-in.

Hinuon, may less fortunate pud kanila. Walay kuwartang ikaparetoki sa lawas aron unta maka-trans gender. Sagad nila, labi nag makainom, mao ang mag-una-unag parayeg sa lalaki ug magbuhat og binastos. Busa, mabaslan pog binastos.

Mao nga kining Bawal Bastos Law dako kaayo ning tamparos sa atong mga eskuylahan. Di unta ni mahimugso kon wala pa mawagtang ang pokus sa atong mga titser, from pre-school to college, ang pagtudlo og Good Manners and Right Conduct (GMRC) sa kabataan aron unta magtubo silang puno ang kasingkasing sa tumang pagkamatinahoron.

Tan-awa, oh. Pipila na lang ka bata karon ang kaantigo mo-amen sa ilang ginikanan human sa orasyon? Anaa pa kaha?

Panahon na nga iapil sa curriculum ang subject nga GMRC from pre-school to high school.

Dep-Ed Heads and Director, kaya ba?