Legal nga paagi sa pagsagup sa bata

Dear Atty. Divine:

Duna koy pag-umangkon nga gisagop sa akong iyaan.  Wa moagi sa court ang pagsagop kay gibutang lang sa Birth Certificate sa bata nga ang akong iyaan ug ang iyang bana maoy mga ginikanan niini. Apan nabalaka mi kun unsay legal unya nga epekto niini. Gusto karon sa akong iyaan nga ipaagi sa legal ang pagsagop sa akong pag-umangkon alang sa protection sa bata, unsay angayan nila nga buhaton? Daghang salamat.

Mel

* * *

Dear Mel,

Tungod kay wa moagi sa korte ang pagsagop sa bata dili gyud kini mamahimong legal ang iyang adoption. Usa ka simulation of birth ang gihimo sa imong iyaan kun pag-tamper sa birth certificate sa bata sa Civil Registrar  nga diin ilang gipalabas nga sila maoy mga biological parents sa bata ug usa kini ka kalapasan sa balaod. Tungod niini, mamahimo unyang kuwestiyonon sa mga heirs sa imong iyaan ug sa iyang bana ang katungod unya sa maong bata sa pag- inherit kay wa man moagi sa court ang iyang pagsagop. Ang remedyo niini mao ang pagpasaka og petition sa korte base sa Rule 108 of the 1997  Revised  Rules of Court alang sa correction or cancellation of entries sa birth certificate  sa bata, korihian nila ang sayop nga entry sa name sa parents sa birth certificate sa bata  ug human niini, ilang ipasaka ang Petition for  Adoption sa bata aron hingpit nga moagi sa sakto nga proseso ang pagkasagup niini og wa na unyay mo-question sa iyang katungod isip legitimate nga anak sa nagsagup kaniya. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St. Cebu City or email sa flores_ [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.