Bukol sa suso: Fibrocystic at biopsy

MAPALAD tayo dahil si Dr. Meredith Garcia, isang cancer­ specialist sa PGH, ay nagbigay ng payo tungkol sa bukol sa suso.

Heto ang paliwanag ni Dr. Garcia:

Dahil ito ang pinakamadalas na tanong, heto ang ka­alaman tungkol sa fibrocystic changes sa suso.

Una, ang fibrocystic changes ay hindi kanser. Ito ang pang-karaniwan na benign kondisyon ng suso.

Ang ibig sabihin ng fibrosis ay laman na parang peklat­. Ang cysts ay bilog-bilog na may lamang likido. Ito ay karaniwang nalalaman ng doktor base sa sintomas ng mga umbok sa suso, pamamaga at pag-kirot.

Kadalasan ay mas nadadagdagan ang mga sintomas nito sa panahon ng mens o regla dahil may pagbabago sa istruktura ng breast na dulot ng mga hormones na kaakibat ng pag-reregla.

Ngunit kung mayroon ka ng mga sintomas na ito, hindi pa rin tayo tiyak na fibrocystic changes lang iyan. Kaila­ngan na magpatingin sa doktor para masuri ang sinto­mas mo, upang malaman kung ano ang inyong mga bukol, kung kailangan ba ng biopsy, at kung ano ang dapat gawin.

Biopsy ng bukol, makatutulong sa pag-gamot:

Maling Paniniwala: “Dok, ayaw ko magpa-biopsy kasi sabi nila kakalat lalo ang bukol kapag nagalaw.”

Sagot ni Dr Garcia: Ang kanser na hindi na-biopsy ay hindi magagamot ng tama kung kaya sigurado ang pagkalat at paglala nito.

Ayon sa isang siyentipikong pag-aaral ng mahigit 2,000 pasyente na dumaan sa biopsy sa Mayo Clinic sa Amerika, walang sapat na basehan ang haka-hakang ito.

Sa katunayan, nakita nila na mas mahaba ang buhay ng mga pasyenteng may kanser na na-biopsy. Ito ay dahil mahalaga ang biopsy upang matukoy ng mga doktor ang eksaktong klase ng kanser at maibigay ang pinakaepektibong gamutan.