Relasyon

Niining umaabot nga administrasyon ni Cebu City mayor-elect Edgardo Labella, makapaabot ang mga Sugboanon nga mahibalik ang maayong relasyon tali sa lokal nga kagamhanan sa dakbayan ug sa puwersa sa kapolisan.

Kahinumdoman nga maayong pagkasiak ang relasyon tali sa dakbayan ug kapolisan sa dihang gipasanginlan ni Mayor Tomas Osmeña ang mga pulis nga maoy nagpaluyo sa serye sa mga pagpatay dinhi sa siyudad ug probinsiya.

Kini misamot pa sa dihang gipasanginlan usab ni Osmeña ang kapolisan sa dakbayan nga midapig kuno sa kampo ni Labella, ang iyang kontra sa niaging piniliay, ug nga mi-harassed kuno sa iyang mga political supporters.

Ug dako kining paghibalik sa maayong relasyon nga kalamboan alang sa kampanya sa otoridad pagpatunhay sa kalinaw ug kahusay sa siyudad. Kini tungod kay mahibalik na man unya ang dakong suporta sa lokal nga pangagamhanan ngadto sa kapolisan.

Gani misaad si Laballa nga kun moasumir na siya sa pagkamayor, iya unya nga dugangan ang financial allowance sa kapolisan. Kini gawas pa sa mga sakyanan nga i-donate unya sa dakbayan ngadto sa Cebu City Police Office.

Hinuon maayo kini nga kalamboan. Kini gumikan kay nagkinahanglan gayud og dakong tabang ang kapolisan gikan sa lokal nga pangagamhanan aron nga mas mapakusgan pa ang ilang kampanya alang sa kahusay ug kalinaw.

Tungod sa ka kulang sa budget sa kapolisan matag tuig, dili ikalimod nga piang gayud ang ilang operasyon batok sa kriminalidad. Usa sa mga problema mao ang kakulang sa sakyanan ug ubang resources alang hapsay nga operasyon.

Niadtong una, buhong sa assistance ang kapolisan sa dakbayan, gikan sa sakyanan, gasoline, armas hangtud na sa pinansiyal nga allowance. Apan nakumpromiso ang maong assistance sa dihang naguba ang maong relasyon tali sa City Hall ug kapolisan.

Angay lamang nga tinud-on ni Labella ang iyang paghatag og mga assistance ngadto sa lokal nga kapolisan. Angay lamang niya nga hakpon ang panahon samtang mipadayag pa og signal ang liderato sa Police Regional Office-7 nga andam sila nga makig-uli og maayong kabubut-on uban sa kagamhanan sa siyudad.