Nisiwil

Nisugod na og siwil ang tinuod nga motibo sa mga tawo nga naghulhog sa mga residente sa Barangay Binaliw aron protestahan ang operasyon sa landfill nga gipanag-iya sa ARN Waste Management Inc.

Usa sa mga tag-iya sa maong kompaniya mitug-an nga nag-andam sila karon og asunto batok sa usa ka barangay official nga gikatahong mipasumbingay nga mangayo sila gikan sa mga tagdumala sa landfill.

Ang akong tinubdan nagkanayon nga human gyud sa eleksiyon, ang nahisgutang opisyal nga kaalyado sa umaabot administrasyon dinhi sa dakbayan sa Sugbo miduol dayon nila og miprangka nga sila na kuno maoy mokubra sa unsa may gihatag sa kompaniya ngadto sa kasamtangan nga administrasyon.

Nangangha intawon ang mga tag-iya sa landfill tungod kay matud nila lehitimo ang ilang negosyo ug wala sila mamayad og suborno ni bisan kinsa aron makahimo sa ilang operasyon.

Labaw na nga wala sila magapil-apil sa politika dinhi sa dakbayan sa Sugbo. Hinuon dunay politiko gikan sa laing syudad nga usa sa mga tag-iya sa landfill.

Sigun sa akong tinubdan gipreparar na nila ang affidavit alang sa kaso nga isang-at batok sa usa ka opisyal sa barangay nga wala gyud maikog modemanda nga sila na kuno maoy modawat. Ambot unsa kahay ilang dawaton.

Sigurado ko nga way kalibutan si incoming mayor Edgardo Labella sa gihimo niining iyang kaalyado.  Mentras sayo pa maayong pasidan-an ni Labella ang mga tawo nga nagpalibot niya nga dili moabuso ug magpakauwaw niya.

Nakaila ko ni Labella ug nituo ko sa iyang kaligdong tungod kay dugay siyang nag-alagad isip usa sa mga direktor sa Ombudsman-Visayas. Usa siya sa akong mga news sources niadtong nagsugod pa ko isip reporter.

Busa nakaila ko sa iyang batasan ug sigurado ko nga kun duna may iyang mga kaalyado nga nagsugod na sa pagpahimulos sa ilang kadaugan sa miaging eleksiyon, wala siyay labot niini.

Apan isip pangulo sa ilang grupo ug umaabot mayor sa dakbayan angayang badlongon niya ang iyang mga sakop ug pasidan-an nga di magpakauwaw.

* * *

Gisusi sa The Freeman ang facility didto sa Binaliw og  nasuta nga moderno ang ilang operasyon.

Di tinuod nga baho ang facility sukwahi sa mga reklamo. Hinuon dili malikayan nga matag karon ug unya dunay manimaho apan dili gikan sa landfill kun dili sa mga sakyanan nga naghakot sa basura.

Gipasabot sa mga tagdumala sa landfill nga sa higayon nga moabot sa ilang facility ang basura, ipaubos dayon kini sa proseso aron mawagtang ang baho. Gani mogasto sila og P1 million matag-adlaw pagkuha lang sa baho.

Dili makiangayon kun ang baho sa mga truck sa basura imong ibasol sa mga tagdumala sa landfill.