Modernong transport system

Hangtud karong panahona, wala pa gyud mibuwelo ang lakang pagtukod og mass transport system dinhi sa Sugbo. Gani, ang light rail transit system ug bus rapid transit system nga hagbay rang giduso dinhi, wala pa gayud makabuwelo.

Hinuon misaad si Presidential Assistant for the Visayas Michael Dino nga matuman gayud ang LRT ug BRT niining administrasyon ni Presidente Rodrigro Duterte.

Kining maong mga proyekto maghiusa ilalum sa Integrated Intermodal Transport System (IIMTS).

Niining nahabilin nga mga tuig sa administrasyong Duterte, gipasalig ni Dino nga madayon gayud ang LRT dinhi sa Metro Cebu. Alang kaniya, ang BRT mo-connect lamang sa IIMTS terminal diin mag-abot usab ang mga linya sa LRT ug uban pa.

Matud ni Dino nga gisubmiter na ang mga dokumento sa LRT ngadto sa National Economic Development Authority ug sa Department of Transportation alang sa dugang pagtuon ug pagpahigayon og usa ka Swiss challenge.

Suportado usab ni Cebu City mayor-elect Edgardo Labella ang LRT.

Matud niya nga iyang pangusgan nga matuman gayud kini. Gani usa ang LRT sa iyang gihisgotan uban ni Duterte sa iyang pagbisita sa Malacañang sa wala pa ang eleksiyion.

Kinahanglan lamang nga himoon nga prayoridad ni Labella ang modern mass transport alang sa dakbayan. Hinuon, hayag kini nga maimplementar tungod kay motabang gayud si Dino sa pagpatuman niini tungod kay tawo man siya sa Malacañang dinhi sa Sugbo.

Mas angay nga maningkamot ang atong mga opisyal nga maimplementar kining mao nga proyekto ilalum sa administrasyon ni Duterte.

Kay lisod na kay basin unya kun maunsiyami kini kung maabtan pa kini sa bag-ong administrasyon.

Hagbay ra ang Sugbo nagkinahanglan og moderno nga sistema sa transportasyon. Kaniadtong 1990s giduso ang LRT ni Kongresista Eduardo Gullas.

Apan pakyas kini sa pagkamang gumikan sa kakulang sa suporta sa pipila ka sektor, gawas nga nagtangag kini og dako nga pundo.

Ang BRT kusganon usab nga giduso ni Cebu City Mayor Tomas Osmeña sulod na sa daghang panahon. Apan daghan usab ang mibabag niini.

Kini tungod lagi sa kahagip-ot sa kadalanan sa siyudad nga matud sigurado nga momugna kini og dakong problema sa trapiko.

Panahon na nga mapatuman ang moderno nga mass transit system dinhi sa Sugbo.

Salikwaot nga paminawon nga usa sa nag-una nga lugar sa nasud ang Metro Cebu apan kulang kini sa bag-o nga sistema sa transportasyon.