EDITORYAL - Buhat maoy pasultihon

Natapos na ang eleksyon ug gilampurnas sa mga kandidato sa administrasyon ang taga oposisyon ug uban pang kandidatong dili nila kaabin sama sa gipaabot nga mahitabo.

Tungod ba kaha ni sa kakulang sa popularidad sa maong mga kandidato, lupig sila sa estratehiya sa pangampanya o ang bertud ni Pres. Duterte maoy nakasuhong sa ilang kandidatora?

Bisan tuod og mga utokan ug may kasinatian ang pipila sa mga kandidato sa pagka-senador wala sila manimaho batok sa mga bagitong kandidato ni Duterte.

Sila si kanhi special assistant to the president karon senator-elect Christopher Lawrence “Bong” Go ug kanhi PNP Chief karon senator-elect Ronald “Bato” dela Rosa pulos mga taga Davao parehong wala pa sukad  nahimong mga magbabalaod sa tibuok nilang kinabuhi.

Sa 12 ka nakadaog nga senador sa miaging eleksyon, siyam niini mga kaalyado o giendorsar ni Duterte ug sa iyang anak nga si Davao City Mayor Sara Duterte. Sila mao si Cynthia Villar; Bong Go; Pia Cayetano; Bato dela Rosa; Sonny Angara ; Imee Marcos ; Francis Tolentino; Koko Pimentel; ug Bong Revilla.

Kun buot ayuhon og tan-aw, bugtong si Tolentino lamang sa siyam ang dili kaayo ilado bisan pa man og siya maoy kanhi Metropolitan Manila Development Authority gikan tuig 2010 ngadto sa 2015 sa panahon ni kanhi presidente Benigno “Nonoy” Aquino.

Apan makita gyud dako kaayo ang natabang ang pagkampanya sa pangulo para makadaog silang Go, Dela Rosa ug Tolentino.Napamatud-an kini dihang nakasulod sa Magic 5 sila si Go ug Dela Rosa.

Dili paigo ang ilang pasalig nga independente sila ug dili magpa-impluwensya sa presidente isip mga magbabalaod sa Senado.

Kinahanglang ilaha kining ipakita pinaagi sa buhat sugod karong Hulyo 1 pagsugod sa ilang termino apil niini ang panahon sa nahibiling katunga sa unom ka tuig nga termino ni Duterte.