Panid-an nato ang bag-ong Kongreso

Inig sugod na unya sa bag-ong Kongreso, mayoridad sa mga bag-ong opisyal kaalyado ni Presidente Rodrigo Duterte. Kini human nga miani og dakong kadaugan ang mga kapartido sa kasamtangan nga administrasyon.

Sa Ubos Balay Balauranan, mipakita og maayong labok ang mga kandidato sa partido sa presidente. Gani makasiguro na usab ang administrasyon nga kaalyado niini ang umaabot nga ituboy nga House speaker.

Didto sa Senado, human sa kaparotan sa mga kandidato sa oposisyon, mayoridad sa bag-ong hut-ong niini mga kaalyado sa presidente. Ug makapaabot kita nga ang sunod nga liderato sa upper chamber adunay dakong suporta gikan sa Malacañang. Unsa may nakita sa kinabag-an niining mao nga kalamboan? Daghan ang nag-ingon nga nahadlok silang mamahimo unya nga rubberstamp ang Senado ug Ubos Balay Balauranan sa kagamhanang  Duterte.

Daghan ang nangutana nga maayo kaha kini nga klase sa kamada? Tungod lagi kay mga kaalyado man sa administrasyon ang Kongreso dili ba kaha nga sayon lamang nga mahimo sa kagamhanan ang gusto niini bisan kon ang uban nga mga lakang niini mga kwestiyonable?

Atong unya nga panid-an. Kay dili usab magsilbi nga pulos na lamang sunodsunoran ang atong mga magbabalaud sa unsay gusto sa presidente. Kinahanglan nga ipakita usab nila ang ilang pagka-independente isip usa ka sanga sa kagamhanan ilalum sa demokratikong proseso.

Hinuon, sukad sa iyang paglingkod sa Palasyo, wala pa kita makasagap og dakong kontrobersiya diin morag diktador nga mikupot si Duterte sa renda sa Kongreso ug mimando sa angay nga buhaton sa mga magbabalaud.

Ambot basin mausab ang dagan sa hangin inig lingkod na unya sa mga bag-ong napiling senador ug kongresista. Kini ilabina nga duha sa labing suod sa president ang molingkod diha sa Senado: si Bong Go ug Ronald “Bato” Dela Rosa.

Apan tan-aw nako, pabiling nga usa ka independenteng institusyon ang Kongreso inig abli na unya niini. Dili makatugot ang atong ang mga magbabalaud nga mahimo unya silang kataw-anan kon magsige na lamang sila og tila sa administrasyon. Kinahanglan nga ipakita usab nila nga aduna silay lahi ug patas nga papel nga gihuptan alang sa maayong dagan sa demokrasya. Kay basin unya kun sudyaan sila sa katawhan nga maoy nagtuboy kanila sa puwesto.