Pag-impound sa mi-counterflow hunongon

Kadaghanan sa mga motosiklong drayber badlongon. Bisag niadtong higayon nga gihingusgan ni Mayor Tommy Osmeña ang pag-impound sa mga nasakpang motorsiklong mi-counterflow sa naghuot na natong kadalanan, naa gyoy mga barumbadog utok nga dili mosunod sa  balaod.

Resulta, daghang motorsiklong kiat na-impound. Ang sakit, kay si Osmeña pa ang gisaway. Samtang ang nakasala, mao pay gilabanan sa kunohay naluoy’ng concerned citizens.

Sa Facebook, mibuhagay kining pipila ka komentaryo: Ang maong balaod anti-poor. Kay wala kunoy kaluoy sa pobreng drayber nga may datahan kada bulan didto sa kompaniya, diin giutang ang naasoyng motorsiklo aron himoong habalhabal isip tuburan sa inadlawng hinaguan nga sarang ikabuhi sa iyang pamilya.

Ang tag-iya sa maong komentaryo klaro kaayo nga di kaantigo mosunod og balaod. Kay imbes maymayan ang badlongon nga dili mao ang gihimo ug tudloan unsay husto, pastilan, gisuportahan pa man hinuon aron mahimo gyong pobre forever.

Pobre sa natad sa pagbinuotan nga makahatag untag kaharuhay sa kinabuhi. Ug pobre sa espirituhanong bahandi nga sa iyang kalag unta makapahalangit.

Ang Ginoo nag-ingon: ‘Nga kon kamo nakakita sa inyong igsuon nga misimang sa daotang dalan, kabiga gyod siya sa husto.

Ug kon bisag giunsa ninyo sa pagpasabot, nagdumili gihapon sa pagsunod, duola ang lain ninyong mga suod ug patabanga sa pag-agak. Ug kon dili gihapon siya maminaw, may dako siyag tulobagon ngadto sa Amahan pag-abot sa tukmang panahon. Pero ninyong naningkamot, wala kamoy tulobagon.’

May balaod nga kinsa kadtong motoristang masakpang mo-counterflow, dakpon ug i-impound ang sakyanan. Ug may mga masinopakon nga gipahamtangag silot. Sala ba diay ang paghatag nilag disiplina?

Sayod man sila nga kon ipakong ilang ulo sa konkretong paril, mabuklan sila. Unya nganong tuyoan man? Lisod ba diay ang pagsunod sa simpleng balaod?

May huhungihong nga sa panahon unya ni Mayor Ed Labella hunongon na kuno ang pag-impound sa mga mi-counterflow nga mga sakyanan.

Kon tinuod man kining balitaa, mosamot gyod ka badlongon ang mga abusadong motorista.

May linibo man gani nila ang pabiling wala morespeto panahon ni kanhi Mayor Tommy Osmeña, kinsa kusganong miiplementar sa maong balaod.

Unsa na kaha, kon hingpit na gyod kining wad-on? Hinaot unta, nga dili kini madayon.