Mga tren
PAANO naman “nabuhay” ang “patay” na tren ng LRT-2? Ito ang paliwanag ng mga opisyal sa ngayon sa nagbanggaang dalawang tren ng LRT-2. Nakaparada raw ang “patay” na tren nang biglang umandar at sumalubong sa umaandar na tren. Wala nang nagawa ang umaandar na tren kundi huminto at hintayin ang pagtama ng “nabuhay” na tren sa gitna ng Anonas at Cubao station. Tatlumpu’t isa ang nasaktan sa insidente.
Ito ang kauna-unahang insidente ng banggaan sa LRT-2. Kasalukuyang may imbestigasyon. Hindi ko alam kung paano pinaaandar ang mga bagon ng LRT-2, pero ang hinala ko lang ay nang “mamatay” ang tren, baka hindi naibalik ang silinyador o kung anuman ang nagpapaandar sa bagon. Nang magkaroon muli ng kuryente, umandar nang mag-isa ang tren. Dalawang tren kaagad ang hindi na muna magagamit. Dapat mailabas kaagad ang resulta ng imbestigasyon, para hindi na maulit. Ang LRT-2 pa naman ang walang aberya tulad ng dalawang linya.
Ano na ang balita sa mga Dalian train? Noong kalagitnaan ng Abril, may dayuhang vlogger na nag-upload ng video ng mga tren na ito. Malamig daw ang aircon. Ipinakita pa ang lugar ng operator. May mga lugar para sa wheelchair at may seatbelt pa para hindi gumalaw. May fire extinguisher sa tabi ng bawat pinto. Ipinakita pa ang mga piyesang nakalagay sa bodega, kung sakaling kailanganin ng mga bagon. Higit 6,000 kilometro na ang itinakbo. Sa madaling salita, puwede nang gamitin.
Isang buwan ang lumipas, walang balita kung ginagamit na o puwede na ngang gamitin ang Dalian trains. Tatlong taon nang inaayos ang mga tren, na noong dumating sa bansa ay hindi raw magamit dahil sa iba’t ibang dahilan. Pero kung ipinakita na nga ng vlogger, na may pahintulot din ng MRT, na maayos na at puwede nang gamitin, bakit kaya hindi pa ginagamit? May inaayos pa ba? Ilang beses nang narinig na puwede nang gamitin, bakit wala pa kung ang publiko naman ang makikinabang nang husto?
- Latest