EDITORYAL - Hustong paggamit sa internet

Usa ka pagtuon ang nagpakita nga ang Pilipinas usa ang Pilipinas sa onse ka mga nagkauswag nga nasud sa kalibotan nga na-expose sa mga pekeng impormasyon nga mabasa diha sa internet.

Ang internet adunay daghang kapilian aron kakuhaan og mga impormasyon ug mga pagtulon-an. Apan sagad sa gigamit sa mga tawo ilabi na sa kinabag-ang Pilipino mao ang social media.

Nigawas sa pagtuon sa United States-based Pew Research Center nga ang Pilipinas ikaunom sa mga ‘emerging countries’ nga ang katawhan na-expose sa daghang mga fake news o mga sayop nga impormasyong gikan sa internet.

Sa report sa The Philippine Star, giingong dunay 2,487 ka mga Pilipino nga gipangutana bahin niini, ug nigawas nga 68 porsiyento kanila ang nakabasa o nakakita og mga posts sa social media nga mga dili tinuod, o mga fake news. Naguna sa listahan sa mga katawhang na-expose niini ang Tunisia , Lebanon, Vietnam, Jordan, ug South Africa. Sunod sa Pilipinas ang Venezuela , Kenya, Colombia, India ug Mexico.

Daghan sa mga gi-survey ang nagtuo nga gigamit karon ang mobile phones, social media ug ang internet aron manipulahon ang publiko pinaagi sa pagpakatap nianang mga pekeng impormasyon o fake news.

Tungod niini, dili imposibleng gigamit sab sa mga politiko ang internet aron manipulahon ang mga botante.

Ang pag-maintain niini sa internet dili tiaw nga gastos gumikan kay magkinahanglan ang mga politiko og mga tawong mohimo, mopasapasa niini.

Pinaagi sab niini, ang mga politiko ug kadtong ilang mga sinuholan sama sa mga “trolls” diha sa social media makahimo pagbahin-bahin sa katawhan ug mamanipula ug makaimpluwensya sa mga tawo kun kinsay botaran.

Apan samtang tuod adunay mga negatibong bunga ang social media, aduna man sab daghang kaayohan nga makuha sa paggamit niini tungod kay mas sayon naman hinuon ang komunikasyon.

Daghang maayo og bati sa internet, apan naa na sa tawo kun dili niini gamiton ang utok kun unsaon kini paggamit ug pagsabot.