Magnanimous in victory

Mao kini ang atong gipaabot nga maoy gibati ug maoy buhaton sa mga nakadaug sa niaging eleksyon. Ug unsa may kahulogan o synonyms sa magnanimous?

Forgiving, free of vindictiveness, generous, charitable, large hearted, liberal, philanthropic, unselfish, noble.

Sa ato pa, mapasayluon, dili madinumtanon, dili manimalos, manggihatagon, lapad og kasingkasing, dili hakog, ligdong ug dungganan. Hinaut mao kini ang gibati karon sa mga mananaug.

Nga dili nila pahimuslan ang ilang kadaugan sa pagpanimalos ug pagpanghimaraot sa ilang mga kaatbang nga nangapilde. Dili nila dungagan ang kasubo nga gihambin karon sa mga pildero.

Hinaut nga ang ilang pagdaug maka-expose o maka-uncover ug makabutyag sa ilang pagka-maayong tawo, inay nga kini makapakita sa tinaguan nilang pagkatawo.

Nahinumdom ko sa komentaryo sa usa sa among mga suki kanhi nga Americanhong exporter/importer nga usa kuno sa depekto natong mga Pinoy, nga tapus sa eleksyon ang mopuling maglingkod sa gahum, mo-condemn dayon iyang gipildi nga kandidato.

Unya, ibasura dayon ang mga plano ug mga proyekto sa iyang gipulihan kay maghimo’g  kaugalingong mga plano ug mga proyekto.

Sa America kuno, sa pagka-presidente pananglitan, ipadayon sa president-elect ang tanang mga plano ug mga proyekto sa iyang gipildi nga kandidato.

Dinhi sa ato, sa gusto kita’g sa dili, daghang mga plano ug mga proyekto ang napildi nga administrasyon. Kun atong pakgangon ang maong mga plano ug mga proyekto, tungod lang kay iya sa previous administration bisan kon makaayo sa lungsod, magsugod na usab kita sa sinugdanan, maghimo’g laing mga plano ug mga proyekto.

Matud pa, dili kini maoy nahitabo sa America tungod kay ang bag-ong administrasyon igo lang magpadayon sa mga plano ug mga proyekto sa gipulihan nga administrasyon. Busa, matud ning kanhi suki namong Amerikanhon, kusog ang ilang paglambo ug pag-uswag didto. Ug tapus mapadayon ang mga maayong plano ug proyekto sa previous administration, mao pay ilang pag-introduce sa kaugalingon nilang mga plano ug mga proyekto.

Sa ato pa, wala kanila ang pagdumot ug pagsalikway sa mga maayong plano ug proyekto sa ilang gipilde nga administrasyon.

Mao nga midayeg kita sa gipahayag ni Vice Mayor-elect Mike Rama nga usa ka dakung proyekto ni  Osmeña,  kun siyay pabut-on, iyang ipadayon. Nindot ug atong gipanghinaut nga mao usab kini ang mahunahunaan sa ubang mga napiling alagad sa lungsod sa tibuok nasud, ilabina dinhi sa kaugalingon natong tugkaran.

Human na ang eleksyon. Dili na nato paduwaon ang politika.

Kay kun mao lang gihapon kini ang atong paharion  sa atong galamhan, di gyud mouswag kining atong nasud. Suma,  pila na ka eleksyon ang nilabay  sa atong kinabuhi, pila na ka presidente ang atong gipalingkod sa Malacañang ... nganong nagpabilin man kitang kabus?

Mao lang gihapon ang mga problema nga atong giatubang. It seems nga walay kasulbaran.  Kini, gumikan sa subrang politika. Labing seguro, samtang layo pa ang sunod  nga eleksyon, apan tungod kay dali rang molabay ang tulo ka tuig, kining nakadaug karon, naghunahuna na sa ilang re-election.

Unsaon nato pag-uswag niini?  Kining atong paghupot sa gahom come and go. Lumalabay lang gyud ang tanan. Mao nga maoy atong paningkamotan nga ang gahum nga atong gihuptan karon, ato kining himuon nga kahigayonan panghatag ngadto sa lungsod sa tiunay nga pag-alagad.