Pagtudlo og OSCA head

Gikan sa pagkapupos sa termino ni Doming Chaves isip OSCA (Office of the Senior Citizens Affairs) head sa Dakbayan sa Sugbo sa niaging Disyembre sa niaging tuig, walay gipuli nga sa ato pa sulod sa niaging lima ka buwan, wala kitay OSCA head sa atong dakbayan.

Of course, alang kanatong mga senior citizens medyo nabakikaw ang atong kahimtang.  Dunay haw-ang. Apan alang sa administrasyon ni Osmeña normal ang tanan. Alang kanila, magpabilin man ang kahugpongan sa mga senior citizens bisan kun walay OSCA head.

Apan atong namatikdan nga wala kitay nakita nga mga dagkung kalihukan ang mga senior citizens sa dakbayan gawas sa paghuwat kanus-a manghatag sa binuwan nga cash assistance gikan sa City Hall. Mao na lang kini ang atong activity ug lagmit mao usab kini ang bugtong kalihukan sa mga chapter associations sa nagkalainlaing barangay sa dakbayan.

Nahinumdum si Doming Chaves nga sa iyang panahon, iyang naduaw ang tanang barangay ning dakbayan lakip ang mga mountain barangays subay sa programa pagdala sa buhatan sa OSCA duol ngadto sa mga barangay.

Usa lamang kadto sa regular nga kalihukan sa mga senior citizens. Apan karon, gumikan sa pagka-walay OSCA head, wala nay napasiugdahan nga kalihukan.

Hinumdum sad ko nga dihay core group gilangkuban sa pipila ka aktibong mga sakop sa pipila ka chapter associations sa dakbayan nga regular kaming magtapok sa buhatan ni Doming, magbayloay lang sa mga hunahuna bahin sa kalihukan sa mga senior citizens.

Apan tapos sa pag-assume sa Osmeña administration, nahanaw ang maong core group, nabungkag. In my case pananglitan, wa  na sad ko makaduaw sa buhatan sa OSCA sulod sa tulo ka tuig nga termino ni Osmeña.

Karon, among giplanohan nga banhawon ang maong pundok ug among gipanghinaut nga hatagan sa unang mga pagtagad sa Labella-Rama administration ang pagtudlo og OSCA head.  Ug unta hinayunon na kadtong mga plano kanhi pagbutang og senior citizen center dinhi sa sentro sa dakbayan tungod kay kadtong atua sa SRP, layo kaayo ug dili conveniently accessible sa mga senior citizens.

Diha usay mga plano pagtukod sa Federation of Senior Citizen Associations of Cebu City aron mabug-os ang tingug sa mga senior citizens ning dakbayan. Kay sa pagkakaron gud nag-iyahay man ta. Unya naduhigan sad sa kagaw sa politika.

Gawas niini, wala na man ta makadungog sa FSCAP kon Federation of Senior Citizen Associations of the Philippines. So, dinhi sa ato, let’s get united, magtukod kitag kaugalingon nga pederasyon ug ato kining lig-onon.

Sa ato nang gibalik-balik paghisgut dinhi, ang AARP kon American Association of Retired Persons nga gisakopan sa kapin 42 milyones ka senior citizens ug mga retirees, giisip nga usa sa labing influential nga pundok sa America. Sa ato pa, tungod kay sila nagkahiusa, dili ma-ignored ang ilang tingug. Mapugos gyud og paminaw kanila ang gobiyerno sa America.

Mahimo kaayo ni nato dinhi sa atong dakbayan kun magkahiusa lamang kita diin ang maong panaghiusa mamahimo natong kusog pagbulig sa pagpalambo sa dakbayan.

Mag-usa ta. Ug malipay niini sila si Mayor-elect Edgar Labella ug Vice Mayor-elect Mike Rama tungod kay duol sa ilang kasingkasing ang mga senior citizens ning dakbayan.