EDITORYAL - Debate nakatabang?

Ug natapos na gyud ang gikahinamang debate tali sa mga kandidato sa pagka-mayor sa Dakbayan sa Sugbo nga silang Cebu City Mayor Tomas Osmeña ug Bise Mayor Edgardo Labella. Pareho silang duha nga adunay mga baruganan, husto ug lantip ang mga puntong ilang gibatbat sa usa’g-usa alang sa pagpalambo sa dakbayan ug sa ilang mga konstituwente.

Apan duna ray ubang mga punto nga daw gilihayan sa mga kandidato sa pagtubag nga unta may labot man niini ang haring lungsod. Tingali ang paglikay nila pagtubag sa isyu, mao ray magdiktar unya sa mga botante sa paghimo og desisyon.

Duna say ubang mga pangutana nga dili na kaayo unta importante para sa mga botante, apan giapil gihapon sa paghisgot. Sa gihapon, mahimo kini ug giya sa mga botante pagtan-aw sa malisya sa kandidato pag-isa niadtong mga pangutanaha.

Karon nga nahuman na ang debate, maayo unta og nakapunit og leksyon ang mga botante ug magiyahan unya sa ilang pagbotar karong umaabot nga piniliay.

Apan sa pagkatinuod, ang maong debate dili na makapausab pa sa mga lunod-patay nga supporters sa duha ka kandidato.  Masayop man o masakto ang tubag, alang kanila mao kadtoy husto.

Busa, ang target nga makabi adtong maong debate mao kadtong mga ‘undecided’ pa o una pang higayon nga mobotar dinhi sa siyudad.  Sagad kanila kadtong mga dili gyud lumad nga taga Cebu City apan dugay nang katuigan nagpuyo dinhi tungod kay ngari na sila nanginabuhi ug nagpaeskuyla sa ilang mga anak.

Sila kadtong mga konstituwente nga makatabang og dako tungod kay mapuno man ang ilang boto sa solido nang daan nga supporters sa matag kandidato.

Sa pangutana kun kinsa kanila ang nidaog, bugtong ang nakadungog ug nakakita sa debate ug kadtong may hamtong nga panghunahuna lamang ang makahukom.

Apan bisan pa niini, ang importante nahatagan sa Integrated Bar of the Philippines Cebu City Chapter og kahigayonan ang mga konstituwente sa siyudad nga mabalhiboan ang mga kandidato kun unsa sila kaangayan sa pwestong ilang gidaganan.