Kinsay maayong botaran?

Usa ka tsirman sa dakong kompaniya mipahimangno sa tanan niyang sakop sa pagmabinantayon gayod sa pagpili sa mga kandidato nga milansar sa pagka Senador ug Kongresista ning umaabot May 13 mid-term election.

Matud niya, nga sagad kanila maayo mosaad nga mopanday og balaod para sa kaayohan sa katawhan, pero ang tinuoray’ng tumong mao ra diay ang paghimog proyekto nga ang ilang bulsa ray mabulahan.

Sa laktod ang minilyong budget nga gastoon sa usa ka proyekto mao ray ilang giapas. Kay magkadaghan ang proyekto nga ilang nahunahunaan, magkadaghan usab ang bulto sa salapi gikan sa panudlanan sa gobiyerno ang ilang masakiyo.

Sa Facebook, may gi-post nga bisag ang karsada walay sapa, gibuhatbuhatan gihapog taytayan sa mga guwatsinanggong lider aron may ipakita sa publiko hain mopaingon ang minilyong salapi nga ilang gigasto, diin naklaro hinuon ang kadako sa kantidad nga ilang nakawat.

Kana lang dalan nga maayo pang pagkaaspalto ug molungtad pag dugay ang paggamit, mahibulong ka, nganong sa maghinangat ang eleksiyon, gub-on kinig tuyo aron ayohon pag-usab. Magsakit akong dughan nga magtan-aw, uy!

Ngano? Kay ang kuwartang giusik-usikan lang sa mga magpapiling politiko, gikan intawon na nato, uy, mga magbubuhis! Kinayoran na nato sulod sa daghang katuigan nga kita morag kabaw motrabaho, diin tungod sa unfair labor practice dinhi sa atong nasod, we are not well compensated.

Mao nga wala gyuy empleyado nga nadato. Inig retiro, ang monthly pension kulang ra ipalit sa gimintin nga tambal.

Mao nga gipahimangnoan ni Ma’am  iyang ginsakpan. Nga, be a wise voter! Palikayan gyod niya kadtong mga kandidato nga bisag nangapriso na tungod sa kasong plunder, pork barrel scam ug may pending pang dagkong kaso didto sa lamesa sa hukmanan, nagpakalinis lang gihapon sa paglansar. Masulod pa ra ba usahay sa top 15 SWS survey.

Hinuon, kining SWS survey, kaniadto pa nga dili gyud ko bilib. Usa lang kini ka pang-mind conditioning nga dili motug-an ug makatug-an sa tinuod.

Alang nako, ha? Paagi kini sa pagpanglingla. Kay pinili ra god ang dapit ug gidaghanon sa tawo ang gibasehan sa survey niini.

Unya, agig panapos sa pagpamulong ni Ma’am, siya miingon: “Kon naa na moy napiling mga  tarong, aw, go na!