Si Jose ang mamumuo

Mayo 1 way trabaho kay Labor Day. Ning panahona usab daghan sa mga tawo ang mohimo og mga pagmartsa agig pagsaulog ning maong adlaw sa mga mamumuo.

Daghang mga isyu ang hisgutan apil na niini ang mga katungod sa mamumuo ingon man ang katungdanan sa liderato ngadto kanila.

 Ning paagiha daghan na usab ang mga pagmahay ug singgit sa pangilaba alang sa gitawag nilang kausaban.

Ning adlawa atong gihandum ang hilom nga tawo diha sa balaang kasulatan.

Siya si Jose ang ama ama ni Jesukristo. Usa siya ka panday ug sa maong buhat iyang gibuhi ang iyang banay.

Gitudloan pud tingali niya si Jesus niini kay ang panginabuhi sa amahan mao man pud ang mamahimong panginabuhi sa anak.

Sa ato pa, ang maong panginabuhi dili angay ikauwaw kay ang pagtrabaho gihimo man nga balaan sa Dios. Ning atong panahon karon kadaghanan nato nangita og trabaho tungod sa rason nga ekonomikal. Buot kitang motrabaho aron mabuhi ug makakwarta.

Ang pagtrabaho baya kun buot hunahunaon expression man sa atong pagkatawo.

Matud pa kun unsay atong agi mao man ang atong pagkatawo.

Ning paagiha nakita nato ang atong pagkamamugnaon diha sa atong paghimo og bisan unsa.

Sa laing bahin ang pagtrabaho maoy nakapahimo natong makapuyo sa mas dungganon nga kinabuhi. Way luna sa kalibutan ang tawo nga tapolan.

Ug labaw sa tanan ang pagtrabaho matang usab  sa pag-ampo kun himoon nato kini uban ang dakong pagpaubos ug pagtinarong atong mahimaya ang Dios nga maoy tinubdan sa tanang kaayo.

Ayaw kaguol ug kauwaw kun ugaling imong kamot sa trabaho mahugaw kay bulahan ka sa tanan kaysa mga tawong kansang mga kamot way kubal kay nahimong mga alimatok ngadto sa uban.