Makapahiubos gyud kayo

Base sa makita nimo sa CCTV footage, grabe kaayo ang gihimo sa giingong mga polis nga mironda sa usa ka kompyuteran ug midakop sa giingong usa ka drug suspect.

Sayonan ka nga kulata diri, kulata didto. Bastrok sa pul-an sa Armalite, duslak sa sumbohan ngadto sa mga sibilyan. Dili man ko usa ka polis apan sa kapin 11 ka tuig nga nahimo ko nga police reporter, maantigo na ko sa trabaho sa polis.

Bisan pa og suwayan nga idestino ko sa intelligence, operations, investigation, kamao ko niana. Mao nga nakaingon ko nga wala na masubay sa tukma nga lagda ang gihimo sa mga polis, kon ang mga sakop man kaha sa Drug Enforcement Unit (DEU) sa Talamban Police Station ang naghimo niadto.

Angay nga ang akong amiga nga si Koronel Royina Garma mopaimbestigar niini nga isyu ug dili nimo labanan ma’am kadtong mga nakahimo og salaod kay makadaot kini sa imahe sa kapolisan. Abuso na kaayo ang ilang gihimo uy.

Kay dili man gyud magkaduol sila si Garma ug Mayor Tomas Osmeña, awhagon nako ang mayor nga mogamit siya’g abogado aron sa pagtigum og ebidensya aron ikiha ang mga hingtungdan kun may igo siya nga basehanan.

Unya, hangyuon sab nako si Police Sgt. Reoven Carmelo Rota sa DEU Talamban, nga magpa-interview ka sa media kay ang imong ngalan gitug-an ngadto sa mayor nga maoy nangulo sa maong kontrobersyal kaayo nga raid sa kompyuteran.

Ang pagpanakop sa mga badlongon usa ka dalaygon kaayo nga buhat, apan kun dili tumanon sa kapolisan ang tukmang mga lagda, makapasuko kini sa mga tawo ug magdumot na hinoon sa mga polis. Dili ba maam Royina Garma?

* * *

Kaming mga reporter sa Cebu City Hall, panagsa na lang gyud makakita sa nawong sa mga opisyal nga nagpapili sa katungdanan kay kanunay sila nga wala na sa ilang opisina kay nangampanya.

Makita namo sila sa adlaw lang nga Martes kay sesyon man sa City Council. Walay kaso kang Mayor Tomas Osmeña kay bisan og naa kini sa iyang opisina dili man gihapon magpa-interview.

Kadtong miaging Sabado, naghago gyud tawon ang pipila ka mga reporters pag-cover sa Lapu-Lapu Day sa Central Command headquarters sa Apas kay namasin nga maka-interview sa mayor.

Apan wala man makahunahuna si Mayor Osmeña nga kun wala pa ang mga reporters naglaom nga maka-interview kaniya, dili na lang unta kini moadto didto. Sa laktud, nag-usik-usik ra mi sa among oras. Maayo pa’g nangatulog na lang mi.

Sa laktud nga pagkasulti, makapahiubos uy. Wala sab didto si Vice Mayor Edgar Labella ug Royina Garma nga giimbitar man unta sila.