Dili gyud moatras sa debate

Insakto gayud si Cebu City Vice Mayor Edgardo Labella sa iyang baruganan nga dili gayud siya moatras sa dako nga debate alang sa mga kandidato pagkamayor ug pagkabise mayor sa dakbayan sa umaabot piniliay.

Kini aron usab sa pagpakita nga iyang nasinati ug andam gayud siya nga motuki sa mga dakong isyu may kalabotan ang siyudad. Kini isip usab nga nag-unang kandidato alang sa labing taas nga posisyon diha sa City Hall.

Daghan ang mitambag ni Labella nga moatras na lamang sa maong debate. Wala kuno kini hinungdan tungod kay usik lamang kini sa panahon. Usa pa, maayo kuno ang dagan ni Labella sa survey ug wala na gikinahanglan ang debate.

Apan, sa ako nang gikaingon, dili angay nga mosibog si Labella sa maong debate. Naka-commit na kini ug nga angay nga ipadayon gayud niya ang pag-apil sa maong lantugi sa init mga isyu nga nakaapektar sa dakbayan.

Usa pa, dili maayong tilimad-on kun mosibog ang bise mayor. Kini tungod kay magmugna lamang kini og public perception nga miatras sa debate si Labella kay lagi nahadlok makiglantugi sa iyang mga kontra sa pulitika. Usa ka beteranong abogado si Labella ug salikwaot usab gayud nga paminawon kun mosibog siya sa debate. Di ba ang mga abogado maayo man moesplikar sa ilang mga opinyon sa bisan unsa nga isyu, ilabina diha sa hawanan sa korte?

Daghang mga Sugboanon ang nag-atang sa maong debate nga ipahigayon sa Integrated Bar of the Philippines-Cebu City Chapter didto sa City Sports Club pipila ka adlaw sa dili pa ang midterm elections sa Mayo 13.

Sa ila nga pagpaminaw sa lantugi tali ni Osmeña ug Labella, ila unya nga mahashasan ang mga kandidato nga gusto nga mosungkit sa ilang mga boto. Maayo kini nga tulomanon. Kini aron masuta sa ilang mga konstituwente kun kinsa gayud ang angay nga botaran.