Lisud pakigkitaan

Kamong mga nagtinguha nga mahimong opisyal sa kagamhanan, ayaw gyud ninyo og sakripisyoha ang mga tawo nga gustong makigkita kaninyo kay sila dunay mga tuyo nga naglambigit sa inyong pagka opisyal.

Usa ka opisyal sa kahugpongan sa mga kontraktor sa Sugbo, nagbagulbol kay makigkita unta sa  usa ka mayor, apan mga buwan pa usa siya maatiman.

Halos dili ko makatoo uy, kay usa ka buwan? Apan dihang ang maong kontraktor miingon nga wala siya’y makuha kun maghimo’g bakak batok sa maong mayor, mitoo na ko.

Ang tinuod, dili ra kay ang maong kontraktor ang misulti nako nga lisud gyud pakigkitaan ang mayor sa iyang opisina, ug mao kini ang akong dili gyud ganahan sa mga opisyal.

Matud sa higala nakong kontraktor nga mas bentaha kadto kanhi nga gipulihan niini kaniadto, sayon ra siyang maduol.

Dinhi sa Dakbayan sa Sugbo, kinahanglan nga sila si Mayor Tomas Osmeña ug Vice Mayor Edgardo Labella mohangop sa mga tawo nga gustong makigkita kanila, kun kinsa man kanila ang modaog pagka mayor.

* * *

Uy, naghisgot na man gyud ta ni Mayor Osmeña, motoo ko nga gi-harass siya sa mga polis pinaagi sa pagpahigayon og checkpoint duol gyud sa iyang balay.

Dili unta mailhan kun ang mga miagi pa sa Gervacio Quejada Street, Guadalupe maoy gipangrekisa sa mga polis, apan kadto man nga buot mosulod ug ang migawas gikan sa balay sa mayor maoy giingong gipangsukitsukit ug gikuhaan og hulagway.

Ingon usab niini ang gihimo sa mga polis nga nagpahigayon usa ka operation sa karsada duol sa balay ni Konsehal Mary Ann delos Santos, nga maoy tandem ni Osmeña sa pagka bise mayor.

Nasurpresa gud tawon si Konsehal Delos Santos kay sukadmasukad, karon pa sila makabantay nga mag-checkpoint ang mga polis diha.

Aw, hinoon, may gipahigayon sab nga checkpoint didto duol sa balay ni Vice Mayor Labella sa Barangay Bacayan.

Pero tan-aw nako gihimo lang kadto aron ipatoo nga dili ra kay sila si Osmeña ug Delos Santos ang gihimoan niini. Ang gikuyawan nako nga basin og ang mga botante maluoy na hinoon ni Osmeña ug Delos Santos nga susama og gigukod sa mga polis.

Tan-aw nako karon, init na kaayo ang tinubagay nila ni Osmeña ug Labella kabahin sa mga isyu nga naglambigit kanila.