Checkpoint

Nagpunay og reklamo si Cebu City Mayor Tomas Osmeña sa giingong pagpanghasi sa kapolisan batok sa iyang mga kaalyado.

Matud sa mayor nga gigamit sa iyang kaatbang nga si Bise Mayor Edgar Labella ang kapolisan.

Daghan kuno siya og pruweba pagmatuod nga gigamit sa iyang kontra ang kapolisan.

Usa niini mao ang gihulagway niya nga dili makiangayon nga pagpahigayon og mga checkpoints.

Giapiki kuno sa kapolisan ang mga habalhabal aron pugson nga mosuporta ni Labella.

Gani dihay suwat si Labella ngadto sa kapolisan nga nangabogar sa usa ka habalhabal nga nadakpan atol sa checkpoint.

Laing reklamo ni Osmeña mao ang pagpahigayon og checkpoint sa kapolisan atubangan gyud sa ilang panimay ug sa mga panimay sa iyang kaalyado nga mga kapitan sa kabukiran.

Isip mayor sa dakbayan kang kansang responsibilidad naglakip sa pagpatunhay sa kahapsay ug kalinaw, dili ko kasabot nganong nikisi-kisi si Osmeña sa checkpoint atubangan sa iyang pinuy-anan.

Samang kalibog ang gipaabot sa ubang lungsoranon. Sukwahi sa reaksiyon ni Osmeña, si Labella mihangop ug mipasalamat sa checkpoint sa kapolisan atubangan sa ilang pinuy-anan.

Sa usa ka yanong lungsoranon dili kalikayan nga mangutana duna bay milagro nga gitaguan si Osmeña?

Nganong di siya gusto nga dunay checkpoint atubangan sa iyang pinuy-anan ug sa iyang mga kaalyado?

Sigun sa akong pakisusi dili ang checkpoint maoy dugukan sa reklamo sa mayor. Ang lintunganay sa iyang reklamo mao ang giingong gibuhat sa kapolisan nga nagdumala sa         checkpoint.

Matud sa mayor nga ang tumong sa checkpoint dili ang pagbantay sa mga dautang tawo kun ang pagbantay kinsay mosulod ug gawas sa iyang pinuy-anan.

Pasangil sa mayor mao nga gikuhaan sa kapolisan og hulagway ang mga mobisita kaniya. Kini maoy hinungdan nganong nireklamo siya sa checkpoint.

Angayang ipasabot sa kadagkuan sa kapolisan unsa ka tinuod ang pangangkon sa mayor.

Samtang way magbuot asa ibutang sa kapolisan ang ilang checkpoint, apan angayan tingali nga ilang likayan nga mapasanginlang dunay gilabanan.