Di pwedeng i-annotate isip adverse claim
Dear Atty. Divine,
Ang akong silingan nangutang nako og P250,000 nga payable within 2 years. Misaad siya nako nga kun di siya makabayad sa monthly due iyang tingbon sa pagbayad. Misalig ko niya hinungdan nga wa ko maningil sa iyang monthly dues.
Apan natapos na ang duha ka tuig wa gyud siya mobayad bisan gamay. Sa dihang akong gipadad-an og demand letter wa kini motubag og iya lang gi-ignore ang akong demand niya sa pagbayad sa maong utang. Duna man hinuon ni siyay property ug gusto unta nako nga ma-annotate sa iyang titulo ang maong utang. Ang akong pangutana kun pwede ba ko makapa-annotate sa iyang titulo? Daghang salamat.
Jean
* * *
Dear Jean,
Kun di gyud mobayad ang imong silingan sa iyang utang diha kanimo, ang imong option mao ang pagpasaka kaniya og kaso ngadto sa korte alang sa pagkolekta sa maong utang. Dili mahimo nga imong ipa-annotate isip adverse claim ang maong utang ngadto sa iyang titulo kay ang maong property wa man gihimong collateral sa mao niyang huwam. Gawas pa, adunay susamang kaso nga gidesisyunan ang Korte Suprema ug kini nagkanayon nga ang money claims dili mamahimong ipa-annotate sa titulo isip adverse claim . Sama sa imong kaso, nga unsecured ang loan gihatag sa imong silingan busa dili mahimong imong birahon ang iyang property kun mapakyas siya sa pagbayad sa maong utang. Ang maayo nimong buhaton mao ang pagpasaka kaniya og reklamo sa barangay ug kon di mo ma-settle then mopasaka ka niya og kaso ngadto na sa korte. Thanks and God bless.
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest