EDITORYAL - Daming ‘nene’na nabubuntis ngayon

DELIKADO sa mga kababaihan ang maagang pagbubuntis. Maaring malagay sa peligro ang buhay sapagkat wala pang kamuwang-muwang sa mga maaring gawin sa panahon nang panganga­nak. Mataas ang bilang ng mga kababaihan na edad 15 hanggang 19 ang nabubuntis na wala sa tamang panahon. Napasubo sa maagang pakiki-pagtalik at ang resulta ay ang pagbubuntis. Iglap lang ang nadamang kaligayahan sa pakikipagtalik at ang kasunod ay ang pagpasan sa responsibilidad na hindi napaghandaan.

Sa ulat ng Population Commission noong 2017, nagkaroon ng 47 live birth sa bawat 1,000 kababaihan na nasa edad 15 pataas. Mas mababa ito kumpara noong 2013 na nagkaroon ng 57. Ang mga nabuntis ay pawang nasa mahihirap na komunidad sa rural areas.

Inalis na ng Supreme Court ang Temporary Res­training Order (TRO) sa Responsible Parenthood and Reproductive Health Law noong 2017. Una nang pinigil ng SC ang pagpapatupad ng RH Bill sapagkat hindi masagot kung ligtas ang mga gamot para sa birth control.

Isa sa mga pinangako ni President Duterte noong nangangampanya pa lamang noong 2016 ay ang family planning program. Nang mahalal sa puwesto, hindi pa rin nagbabago ang paninindigan niya sa reproductive health at dapat itong malaman ng mga kabataan. Kaya magandang pagkakataon ito para sa kasalukuyang gobyerno na maisulong ang RH at maituro rin ang kagandahan  ng pagtuturo ng sex education sa mga bata.

May mga kabataan ngayon na inilalagay ang buhay nila sa peligro. Dahil hindi pa handa sa pagbubuntis may mga nagpapa-abort.

Kagaya ng nangyari sa isang babae sa isang motel sa Sta. Cruz, Maynila na ini-abort ang kan­yang pinagbubuntis. Naubusan umano ng dugo ang biktima at patay na nang matagpuan ng room boy. Nakita sa kuwarto ang mga gamot na ininom ng biktima para i-abort ang pinagbubuntis. Masakit ang nangyari sapagkat kasama siyang namatay.

Ngayong inalis na ang TRO sa RH, dapat magsumikap pa ang pamahalaan para maikampanya sa mga “nene” at “totoy ang kahalagahan ng RH law.