Maestrang obligasiyon, gitalikdan

Kaniadto sa nagtungha pa ko sa elementariya, halos tanang school corporal punishment akong naagian. Gikan sa kusi sa bugan ngadto sa lunit sa mga dalunggan, kini akong natilawan gikan sa among magtutudlo nga estrikto ug estrikta.

Dinha man gani higayon nga pag-ingon ni Ma’am Josie, grade one teacher namo: ‘very talkative’, puwerting igoa sa akong nawong sa nasukong eraser nga iyang gilabay.

Pagka Grade 2, nakasulay sab ko’g lingkod sa hangin atubangan sa among klase, isip silot kay wala makahimo sa among assignment.

Ang uban gyud namong klasmet kay gibulad sa init tungod sa flag pole sa eskuylahan. Unsaon, wala man maminaw sa leksiyon ni Ma’am Margarita.

Sagad sa nakatilaw namo’g corporal punishment, nagmalamposon.

Gani, kadtong nangiwit sa among klase, karon, usa na ka batid nga doktor. Ug may kaugalingon nang klinika sa Amerika.

Apan ning atong panahon, diin nahimong over-protective ang gobiyerno sa mga kabataan gumikan ning balaod nga child protective program, diin kun ang magtutudlo, mogamit og corporal punishment, puwedeng ikiha sa ginikanan, ay pastilan, mibaha ang minilyong illegal drugs users ug pushers, uy! Krimen? Rape? Shabu?

Midaghan! War on Drugs? Ay, wala makapugong!

Obligasiyon sa maestra ang pag-agak, pagdisiplina ug pagprotehir sa iyang mga estudyante aron sila mapasubay sa hustong dalan paingon sa mahayag nilang kaugmaon.

Apan makapasubo palandungon, nga may maestrang dili kaantigo manalipod sa iyang mga tinun-an sa yugto nga nag-ungaw sila sa kakuyaw ug nagkinahanglan sa iyang panabang.

Sama niadtong mga estudyante, kinsa bisa’g walay sala ug igong ebidensiya nga nakasala, gidakop gihapon sa grupo sa mga polis kay gipasanginlang illegal drug users ug pushers. Ilang maestra diha sa pagkahitabo.

Ug inay pugngan ang mga malditong polis, kinsa nangutana kun iyaha ba silang mga estudyante, hugot hinuon siyang mitubag og ‘dili.’

Hinungdan, nga napriso gyud ang mga inosenteng bata human talikdi sa walay kasingkasing nilang maestra.

Nahibalo ba kaha si Ma’am, no, nga kadtong iyang gihimo sama ra nga wala niya panalipdi ang ngalan sa mga estudyante ug ang ngalan sa ilang eskuylahan? Hinuon, nagplano ang mga ginikanan ug igsuon sa mga biktima nga ireklamo si Ma’am ngadto sa labing labaw sa maong eskuylahan.  Ug unta maaksiyonan dayon!