Ang plano ni John

Basta moabot na gani ang eleksiyon, bisan unsa na lamang nga pakulo ang ihaling sa mga kandidato. Sa tinguha paghakot og mga botos, gamiton gayud nila ang tanan aron lamang pagdani og suporta gikan sa mga botante.

Sama pananglit sa umaabot nga midterm elections karong Mayo 13. Matag kandidato aduna gyuy ibuhagay aron nga makuha ang atensiyon sa mga botante. Ug kining mga pakulo usahay mahimong dakong kontrobersiya.

Didto sa Dakbayan sa Toledo, adunay nakapakugang nga anunsiyo si Mayor John Henry Osmeña.

Atol sa dakong rally didto sa niaging semana, miingon siya nga iyang buhion pag-usab ang lakang paghimo og laing probinsiya dinhi sa Sugbo.

Matud niya nga ang una niyang buhaton kun modaug siya pagkakongresista sa umaabot nga eleksiyon mao ang pagduso og balaudnon nga maghimo sa ikatulo nga distrito sa lalawigan sa Sugbo isip bag-o nga probinsiya.

Sa iyang plano pagsang-at unya og House Bill, gusto ni Osmeña nga ang third district - gikan sa lungsod sa Barili ngadto sa lungsod sa Tuburan - mahimo nga bag-ong probinsiya nga nganlan og Cebu Occidental.

Miingon si Osmeña nga sa bag-ong lalawigan, ang siyudad sa Toledo mao unya ang Kapitolyo . Ug aduna kini duha ka distrito alang sa Ubos Balay Balauranan. Iyang gipaniguro nga molambo gayud ang Cebu Occidental.

Ambot kun mohakot ba og suporta sa mga Sugbuanon ang iyang lakang pagduso og laing probinsiya gikan sa Sugbo, ilabina sa katawhan sa tersiro distrito.

Sa atong nahibaw-an, ang mga lakang kaniadto paghiwa sa lalawigan wala gayud misaler.

Gani wala na igdungog pa ang katapusang lakang paghimo og lalawigan dinhi sa Sugbo.

Si Kongresista Aileen Radaza miduso kaniadto og balaudnon pag-isa sa isla sa Mactan isip bag-ong probinsiya. Apan nahanaw ang maong lakang sama sa bula.

Sa akong tan-aw, lisod gayud nga molampos kining bag-o nga tinguha paghimo og bag-o nga probinsiya sa Sugbo.

Sa ato nang eksperyinsiya kaniadto, wala miani og dako nga suporta ang mga lakang paghiwa sa Sugbo ngadto sa nagkalainlaing probinsiya.

Sukad pa sa nanglabay nga mga dekada, intact ang Sugbo isip usa ka probinsiya bisan pa sa daghang lalawigan nga gipanghimo.

Kini gumikan kay kabahin na sa kultura sa mga Sugboanon ang maghiusa.

Mora’g usik lamang sa panahon kining maong plano ni Osmeña. Usa pa, dako usab kini nga risgo sa iyang kandidatura.

Kay basin unya kun yam-iran kini sa katawhan ug mao na unya ang hinungdan sa iyang kapildihan.