Hagit sa debate

Tulin pa sa alas kwatro nga mikubit silang Mayor Tomas Osmeña, Bise Mayor Edgardo Labella ug Konsehal Mary Ann Delos Santos sa hagit alang sa dakong debate sa mga kandidato pagkamayor ug bise mayor sa dakbayan sa Sugbo.

Hinuon maayo kini nga kalamboan alang sa mga botante sa siyudad. Kay ari unya nato masaksihan kon si kinsa sa mga kandidato ang adunay maayong panglantaw sa mga nagbagang isyu nga kasamtangang nakaapektar kanila.

Nauna pa niini, ang presidente sa Integrated Bar of the Philippines-Cebu City Chapter nga si Regal Oliva mihagit sa maong mga kandidato alang sa usa ka debate aron lagi nga makita ang ilang katag sa mga isyusa dakbayan. Ang maong debate ipahigayon karong Abril 22 didto sa City Sports Club.

Bilib usab ko si Osmeña, Labella ug Delos Santos kay wala gayud sila nagpanagana pagdawat sa maong hagit. Siguro gusto sila og debate kay, alang kanila, usa kini ka benyo diin makadani unya sila og suporta gikan sa mga botante nga maminaw unya sa ilang pagbatbat sa mga isyu.

* * *

Apan daghan usab ang nasagmuyo tungod lagi kay misibog si kanhi mayor Michael Rama sa maong hagit alang sa debate. Matud niya, nag-una kuno siya sa survey ug wala na kinahanglana pa ang pagsalmot sa mga debate.

Ambot kon nanalaw ba si Rama niining iyang pagdumili pagdawat sa hagit. Hinuon dili kalikayan nga mao kini ang opinyon sa iyang mga kaatbang sa piniliay pagkabise mayor sa dakbayan ug mismo sa publiko.

Basin kon nahadlok si Rama nga sa maong debate motumaw unya pagbalik ang isyu mahitungod sa paghingalan ni Presidente Rodrigo Duterte kaniya nga usa sa lokal nga mga opisyal nga nalambigit sa negosyo sa druga kaniadto.    

Apan, sa laing bahin, oportunidad usab sa kanhi mayor nga gamitaon ang maong debate aron paglimpiyo sa iyang ngalan gikan sa akusasyon sa druga. Gani makapanghambog pa si Rama nga ang pag-isa ni Duterte sa iyang kamot timailhan nga nalimpiyohan na ang iyang ngalan.

Sipyat si Rama. Ang maong debate oportunidad unta niya nga iyagyag ang iyang mga kaalam pagtuhik sa mga isyu may kalabotan ang siyudad. Dili siya angay nga magsalig sa mga survey kay layo pa ang piniliay.