Ang lista sa PDEA

Human gipagawas sa Department of Interior and Local Government (DILG) ang ilang lista sa mga lokal ug nasudnong opisyal nga nalambigit sa gidili nga drugas, gipagawas usab sa Philippine Drug Enforcement Agency (PDEA) ang ilang lista sa mga artista o celebrities nga nalambigit sa gidili nga drugas.

Sigun sa lista sa PDEA, moabot na ngadto sa 31 ka mga celebrities ang nalambigit sa gidili nga drugas. Kaniadto 15 lamang kanila ang anaa sa lista apan sa bagong lista nadugang na kanila ang 16 ka mga artista.

Nunot niini, giawhag ni PDEA Director General Aaron Aquino ang mga television network sa pagpaubos sa ilang mga talents sa mandatory drug test.

Tungod sa awhag ni Aquino, ang duha ka higanteng Television network sa nasud, ang ABS-CBN ug GMA7 mipagawas og pahibawo ngadto sa PDEA ug publiko nga drug free workplace ang ilang network.

Daghan na usab ang nanawagan ug mihagit sa PDEA sa pagpagawas sa mga pangalan sa mga artista o celebrities nga anaa sa ilang lista. Giawhag usab ni Senador Panfilo Lacson, chairman sa Committee on Dangerous Drugs sa Senado ang PDEA sa pagpasaka og kaso sa mga artista nga naapil sa lista sa mga nalambigit sa gidili nga drugas.

Sakto si Senador Lacson. Ang lista god nga giwara-wara sa PDEA wa ni kalainan sa papel nga iilo o iputos sa mangga. Puwede ra gyod ning sunogon o isulod sa basura. Ang lista sa PDEA mapuslan lamang kun kini lista sa mga artista nga napasakaan na nila og kaso tungod sa pagkalambigit sa gidili nga drugas.

Mas katuohan ang lista kun ang mga anaa niini pulos na gipasakaan og kaso tugod kay ang buot ipasabot niini validated na kini og adunay basihanan o ebidensiya.

Samtang dili dautan ang pag awhag sa mga Television Network sa pag paubos sa ilang mga artista o celebrities sa drug test pero para nako wala nay labot niini ang PDEA.

Mas maayong maoy tutokan sa PDEA ang pagpangita og ebidensiya nga ilang magamit sa pagpasaka og kaso batok sa mga artista nga ilang gituohan nga nalambigit sa gidili nga drugas.