4 Ps maayong undangon

Pagkahimugso sa Pantawid Pamilyang Pilipino Program (4 Ps) mihayag ang panagway sa mga kabos sanglit tanang benepisyo nga gipuyos sa panudlanan niining programaha gituyo man pagdesinyo pabor nila. Lalim bay, sa Health Grant matag beneficiary sa pamilya makadawat og P500 kada bulan.

Sa Education Grant ang monitored child sa elementariya, P300 ug sa hayskol, P500 matag bulan sulod sa 10 ka bulan.

Hinuon kutob ra sa tulo ka kuwalipikadong anak ang makapahimulos kada panimalay.

Gawas niini, may Rice Subsidy nga P600 sab nga madawat ang matag kuwalipikadong pamilya.

Unya, may Unconditional Fund Transfer Subsidy (UFTS) pa nga P200 kada bulan sugod niadtong 2018, mi-P300 ning 2019 ug hangtod na sa 2020.

Ang pangutana:  Makapakugi kaha nilang nakapahimulos sa naasoyng programa ang maong tabang, o nakapatapolan hinuon? Wala bay oportunistang misawsaw?

Dili tanang pobre ang nalipay. Kay dunay mas daghan pang tabangonong kabos ang wala mahiapil sa maong benepisyo.

Kana lang mga bulingit nga namunit og biyang karton, basiyong botelya ug uban pang masapian sa pagpatimbang aron lang may ikasugakod sa pagpakabuhi ning atong nasod nga naglumbaanay lang pagsaka ang presyo sa mga inadlawng palitonon, ambot, kanus-a pa kaha sila makatilaw og bisag gamayng pinisik na lang sa kaharuhay gikan sa atong mga politikong lider nga nagpakabana?

Dapat, sila unta ang gihatagag unang prayoridad nga makabenebisyo sa 4 Ps.

Kay bisan sa kapait sa ilang panginabuhi, sila nagbayad sab og buhis sa atong gobiyerno, diin bisan giunsa nilag bayad, sila misamot kapait tungod kay ang unsay ilang gibayad, wala man gayod mahibalik kanila. Unsaon, gipug-ok man sa korapsiyon sa Pilipinas!

May pipila nga magdawatan og 4 Ps benefits nga matod pa sa tabian kong higala, nagpaabot na lang pirme sa maong binulang benepisyo.

Ug sa higayon nga makadawat na, mao kini ang gamiton sa paghuboghubog, pagpanigarilyo ug pagpanugal.

Sa laktod, ang orihinal nga tumong sa programa nga unta aron matabangan ang mga pobre nga makaginhawag diyotay gikan sa kalisod, namatay, human tuk-a sa mga abusado.

Mao nga daghan ang misugyot:  “Maayo pag undangon na lang sa hingpit kining 4Ps.

Ug ang minilyon ka pesos nga pundo niini, ibalhin-puno ngadto sa mga livelihood program.”