EDITORYAL - Puno na ang gantangan

Napuno na gyud ang gantangan sa ordinaryong mga Pilipino ilabi na ang mga mananagat nga nagsalig sa kadagatan sa West Philippine Sea hinungdan nga kaliboan ang namirma sa gisang-at nga petisyon batok sa pagpangabuso sa China.

Silang kanhi Ombudsman Conchita Carpio Morales ug kanhi top diplomat Albert del Rosario miduso og reklamo ngadto sa International Criminal Court  batok sa gihulagway nilang crime against humanity nga gihimo sa China pinangulohan ni President Xi Jingping.

Sila mipasangil nga pabiling gihasi ug gidid-an sa China nga makapanagat ang mga Pilipino sa Scarborough Shoal ug sa kadagatan sa Kalayaan Group of Islands (Spratlys).

Daan nang wala tahora sa China ang 2016 ruling sa Arbitral Tribunal nga pabor sa Pilipinas ug gipadayon ang pag-angkon ug pagkontrol sa maong teritoryo.

Samtang nagdumili si Presidente Duterte pag-insister sa ruling tungod kay matud niya walay ikasukol ang Pilipinas kun girahon sa China.

Mas gipili ni Duterte nga makighigala sa China. Ang China nipautang karon og binilyon ka kwarta sa Pilipinas aron matukod ang mga gisaad nga proyekto ni Duterte sa nakalabay nga kampanya.

Dili garantiya nga masilotan ang China kay dili sila signatory sa Rome Statute maong wala silay nalapas nga kasabotan nga maoy gibasehan pagkatukod sa ICC.

Usa pa, una nang nakaduso og komunikasyon ang gobiyerno ni Duterte paggawas sa ICC samtang naduso ang reklamo duha ka adlaw sa dili pa hingpit mamahimong epektibo ang paggawas sa Pilipinas sa kasabotan.

Nigawas ang Pilipinas sa ICC nunot sa pagsige og saway kang Duterte tungod sa pasangil nga human rights violations sa kampanya niini kontra ilegal nga drugas.

Si Justice Secretary Menardo Guevarra miingon nga isipon nalang nga “political statement” ang maong reklamo kay di gyud modaog niini ang mga mananagat.

Apan gipakita dinhi nga ang mga ordinaryong Pilipino nisungag sa higanteng China. Pagpakita sab kini ngadto sa kalibotan nga dili tanang Pilipino ang nakauyon sa palisiya karon ni Duterte ngadto sa China.