Problema sa tubig

Opisyal na nga miabot ang ting-init dinhi sa nasud. Kini matud pa sa Philippine Atmospheric, Geophysical and Astronomical Services Administration (PAGASA) nga mipahimangno sa grabe nga kainit nga atong masinati sa umaabot nga adlaw.

Matud pa sa weather bureau, dili ordinaryo nga kainit ang atong masinati karong panahona kun dili grabe gyud nga kanit dala sa giingong mild El Niño phenomenon nga nagsugod na og lapdos sa nasud.

Ug dili tiaw unya ang epekto niini.   

Hinuon basta ting-init na gani, mogara usab ang problema sa kakulang sa tubig dinhi sa Metro Cebu. Problema kini nga motumaw matag tuig ug subong palandungon nga wala gayud kini masulbad sa kagamhanan.

Gani sa niaging mga bulan pa mipasidaan ang Metropolitan Cebu Water District nga kulang na ang suplay ngadto sa mga consumer niini. Kini nunot usab sa nagkahubas nga pondo sa tubig sa Buhisan Dam ug Jaclupan water reserve.

Sa dakbayan sa Sugbo, daghang residente sa pipila ka barangay ang mipiyait tungod sa pagkanihit na sa ilang suplay sa tubig. Gani, adunay pipila ka lugar sa siyudad diini nga wala na gyuy agas ang mga gripo.

Karon igo na lamang nanawagan ang MCWD sa mga konsumedor niini pag-conserve og tubig. Grabe na ang pagrasyon sa maong kompanya sa tubig karon ug nga nagkapuliki na kini pagpangita og dugang source sa tubig.

Ambot pa ining MCWD. Hangtud karon wala pa gihapon niini masulbad ang dakong problema sa kakulang sa suplay sa tubig matag ting-init. Ambot pa nganong magsigi pa kining maong kompanya og salig sa Buhisan ug Jaclupan nga dali ra nga mahubsan sa tubig matag summer.

Niining nagkadakong populasyon sa franchise area niini, angay unta nga doblehon usab sa kompanya ang suplay sa tubig pinaagi sa paghakot gikan sa laing mga source, dili lamang sa Buhisan, Jaclupan ug sa mga deep well niini.

Tungod sa ka dako sa franchise niini, angay lamang usab unta nga mobubo og dakong puhonan ang MCWD pagkuha og tubig gikan sa laing mga lugar. Apan morag hinay man ang kamas sa kompanya pag-invest og dugang suplay sa tubig.

Nagkadako ang populasyon ug nagkadaghan ang mga establisimento sa dakbayan apan subong palandungong padayong nagkulang usab ang suplay sa tubig. Seryoso kini nga problema. Ug angay lamang nga dalion kini pagsulbad sa mga hingtungdan.