EDITORYAL - Banta ni Misuari
HINDI magandang pakinggan ang mga sinabi ni Moro National Liberation Front (MNLF) chairman Nur Misuari na kapag nabigo raw ang gobyerno sa isinusulong na federalism, mag-aalsa siya. Makikipaggiyera raw siya laban sa pamahalaan. Panibagong rebelyon daw ang kanyang ilulunsad kapag hindi itinuloy ang federalism. Ang pagbabanta ay sinabi umano ni Misuari kay President Duterte nang dumalaw ito sa Malacañang. At ang sagot naman daw ng Presidente sa bantang giyera ni Misuari, lalabanan ito. Ipagtatanggol ng gobyerno ang bansa sa sinumang magtangka ng giyera. Kung giyera ang gusto ni Misuari, nakahanda raw si Duterte.
Mabuti naman at hindi nasindak ang Presidente sa bantang panibagong rebelyon ni Misuari. Tatak na ni Misuari ang manggulo kaya hindi na nakapagtataka kung ganito ang kanyang banta kapag hindi natuloy ang federalism. Wala naman siyang nalalaman kundi daanin sa dahas ang lahat.
Nagpapahiwatig na ng gulo si Misuari. Para bang nananakot siya na magkakagulo kapag hindi natuloy ang federalism. Kaya para hindi siya manggulo, dapat matuloy ang federalism. Ano ito, pananakot? Baka sa inaasal na ito ni Misuari ay talagang hindi mangyari ang inaasam na federalism. Baka walang mangyari sa mga balak ni President Duterte sapagkat sa umpisa pa lamang ay nagpapakita na ng karahasan ang MNLF chairman. Hindi sana ganito ang kanyang mga ipahayag sapagkat nanghihikayat ito na magkagulo at magkawatak-watak.
Nagsisikap ang Duterte administration na maisaayos ang bansa at maiwasan ang pagkakagulo kaya dapat makiisa si Misuari sa pagtataguyod nito. Paano siya pagkakatiwalaan kung laging ang bukambibig niya ay mag-aalsa? Sana, makipagtulungan para maabot ang minimithing kapayapaan.
- Latest