Nagkahayag nga kasulbaran

Mora’g hayag na ang dalan paingon sa kasulbaran sa kaso sa linuog nga pagpatay sa 16-anyos nga dalagita didto sa Dakbayan sa Lapu-Lapu nga nakapatay-og pag-ayo dili lamang sa mga Sugboanon kondili sa tibuok nasud.

Kini human nadakpan ang iyang kanhi kuno hinigugma nga maoy gitumbok nga usa sa mga suspetsado sa kamatayon ni Christine Lee Silawan, kansang patay’ng lawas nakit-an nga wala nay underwear sa usa ka dakong bakanteng lote sa maong dakbayan.

Ang 17-anyos nga suspetsado nadakpan sa mga operatiba sa National Bureau of Investigation kaniadtong Sabado sa gabii.

Ug wala na kini buhi-i pa tungod kay aduna kunoy mga witness nga nagtumbok sa maong batan-on nga usa sa tulo ka mga suspetsado.

Aduna nay complaint nga gipasaka ang NBI batok sa maong batan-on didto sa Lapu-Lapu City Prosecutor’s Office. Ug dakong salig ang maong ahensiya sa maong complaint gumikan kuno sa lig-on nga mga ebidensiya nga ilang nakalap.

Ang pangutana karon, masulbad kaha sa daling panahon ang kaso sa pagpatay kang Silawan?

Hinuon sa pagkakaron, aduna pay duha ka suspek nga angay signiton sa otoridad.

Kini basi usab sa pamahayag sa mga nakasaksi sa maong krimen.

Aron moarangkada gayud ang kaso, nagkinahanglan usab og lig-on nga ebidensiya ang prosekusyon aron nga makumbinser ang korte. Hinuon, dako pa gayud nga misyon alang sa otoridad ang pagpangalap og mga ebidensiya nga makakonbikto sa mga akusado.

Sa laing bahin, ang pagdakop sa iyang kanhi hinigugma maayo kini nga development sa kaso sa pagpatay ni Silawan, kansang panit sa nawong, ubol-ubol ug ubang organ ang gilangkat sa mga mamumuno. Kini aron nga mahatagan gayud og daling hustisya ang iyang pamilya. Hinuon wala kini nagpasabot nga sad-an na gayud ang maong dinakpan.

Ang korte ra maoy modeterminar niana.

Apan hinaut nga ang otoridad ug prosekusyon dili magdanghag sa ilang pagpresentar og mga ebidensiya. Kini aron nga walay trampas ang paghatag sa hustisya.