Habal-habal sa Senado
Kun nagtuo ka nga mangiyugpos na si Kongresista Raul del Mar human napasar sa House of Representatives ang kontrobersiyal nga balaudnon sa paglegalisar sa habal-habal, kay wa man gyud to paabuta tungod sa kaapiki na sa panahon, nasayop ka.
Padayong naningkamot si del Mar sa pagkumbinser sa mga sakop sa Senado nga may igo pang panahon sa pagpasar sa ilang kaugalingong bersiyon sa balaudnon aron nga may masumiter sila alang sa posibleng pagpirma ni Presidente Rodrigo Duterte sa di pa motak-op ang Kongreso liwas sa piniliay karong Mayo 13.
* * *
Kay sakop man si del Mar sa gamhanan nga Commission on Appointments (CA), nagkatagbo sila ni Senate President Pro Tempore Ralph Recto, ang nangamahan sa balaudnon sa habal-habal sa Senado, ug Senador Grace Poe, ang chairperson sa Senate Committee on Public Services, sa wa sila mo-adjourn niadtong Pebrero alang sa kampanya sa piniliay.
Matud ni del Mar gipasaligan siya nila ni Poe ug Recto nga kumbinsihon ang ilang kaubanan sa panginahanglan sa pagpasar sa bersiyon sa Senado sa nahibilin nga tulo ka semana nila nga sesyon human sa piniliay.
* * *
Masabot ra gyud unta kun di na matuki ang balaudnon sa habal-habal sa Senado.
Dako nang konsuwelo nga nakaabot ang balaudnon sa kinatas-an nga ang-ang human gipasagdan ang nahaunang mga bersiyon sa nangaging daghan na uyamot nga katuigan.
Mahimo ra gyud unta nga banhawon ang balaudnon sa sunod nga Kongreso.
Kay mas dako na man unya ang tingog sa sunod nga mga tigpasiugda kay naaprubahan na man nga way bisan usang nisupak sa mga kongresista.
* * *
Apan saligi si del Mar nga di dayon molunga. Ang talagsaon niyang record nga way bisan usa ka absent sa tanang sesyon sa House atol sa tanan niyang mga termino sukad sa 1998 nagmatuod og lig-on nga determinasyon.
May sukaranan ang mga drayber ug mga pasahero sa habal-habal nga magmalaumon nga ang ilang kawsa, nga gilingiw-lingiwan lang sud na sa pila na ka dekada, mahimo nga sa kataposan makadama na.
Ug way laing mas takos nga mobarog isip ilang kampeyon gawas sa kongresista sa amihanang distrito sa Dakbayan sa Sugbo nga nakapapasar na og dul-an sa gatos ka mga balaod.
* * *
- Latest
